გერმანიის ეკონომიკურმა გაერთიანებამ, ტურიზმის სექტორში მოღვაწე წევრი კომპანიებისთვის მოაწყო ექსკლუზიური შეხვედრა გერმანიის ფედერალური რესპუბლიკის ელჩთან საქართველოში, ბატონი ჰუბერტ ქნირშთან და EBRD-ის წარმომადგენელთან, ბატონ გიორგი ახალკაცთან. შეხვედრას უძღვებოდა DWV-ს აღმასრულებელი დირექტორი, ბატონი თომას კიმმესვენგერი.

ღონისძიების მიზანს, ტურიზმის სექტორის მხარდასაჭერად, პანდემიით გამოწვეული სირთულეების და პრობლემების გადაჭრის გზების განხილვა წარმოადგენდა.
შეხვედრაში მონაწილეობა მიიღეს, როგორც მსხვილმა, ისე მცირე და საშუალო ბიზნესის წარმომადგენლებმა. კომპანიებს შესაძლებლობა მიეცათ დეტალურად აღეწერათ ის გამოწვევები, რომელთა წინაშეც აღმოჩნდნენ კორონა ვირუსის პანდემიის პირობებში. დისკუსიის ფორმატში განხილულ იქნა კონკრეტული პრობლემები. მონაწილეების მხრიდან გამოითქვა, აგრეთვე, კრიტიკა გარკვეული ღონისძიებების მიმართ, რომლებიც ტურიზმის მიმართულებით გატარდა სახელმწიფო სტრუქტურების მხრიდან.

მონაწილეებმა იმსჯელეს პრობლემების გადაჭრის გზებზე და ხაზი გაუსვეს სახელმწიფო და ფინანსური ინსტიტუციების ჩართულობის აუცილებლობას.