სენიორ ექსპერტთა სერვისი (SES)

სენიორ ექსპერტთა სერვისი (SES) წარმოადგენს გერმანიის ინდუსტრიის საერთაშორისო თანამშრომლობის ფონდს (Stiftung der deutschen Wirtschaft für internationale Zusammenarbeit). ეს არის არაკომერციული ორგანიზაცია, რომელიც გერმანელ ექსპერტებს აგზავნის გერმანიისა და სხვა ქვეყნების კომპანიებში კონსულტირებისა და თანამშრომელთა კვალიფიკაციის ამაღლების მიზნით.

ექსპერტები უსასყიდლოდ ატარებენ ტრენინგს სპეციალისტებსა და მენეჯერებისთვის – ეს არის სისტემა, რომელიც მომგებიანია მისი ყველა წარმომადგენლისათვის.

ექსპერტები თავიანთ მომსახურებას სთავაზობენ მცირე და საშუალო საწარმოებს, სახელმწიფო სტრუქტურებს, ბიზნეს ასოციაციებსა და მომსახურების სექტორებს, რომელთა შორისაც არიან სოციალური, სამედიცინო ინსტიტუტები და პროფესიული სასწავლებლები. ექსპერტის მოწვევის მინიმალური ხანგრძლივობა განისაზღვრება 3 კვირით, ხოლო მაქსიმალური ვადა მასთან ინდივიდუალური შეთანხმების საგანს წარმოადგენს. დაახლოებით 12.500 მრავალწლიანი სტაჟის მქონე კვალიფიციური ექსპერტი, რომელთაც უკვე დაასრულეს თავიანთი სამსახურეობრივი მოღვაწეობა და აგრძელებენ მოხალისეობრივ საქმიანობას SES პროექტის ფარგლებში, მზად არის, მომსახურება გაგიწიოთ 50 სახის საქმიანობის სფეროში. ექსპერტის მოწვევისათვის აუცილებელია, შეავსოთ და გამოგვიგზავნოთ სააპლიკაციო ფორმა.

2013 წლიდან DWV-ს ჩართულობით 290-ზე მეტმა ინსტიტუტმა დაარეგისტრირა ექსპერტის მოწვევაზე განაცხადი და განხორციელდა 170 პროექტი. 2019 წელს, გერმანიის ეკონომიკური გაერთიანების ძალისხმევით, კვლავაც გაიზარდა საქართველოში მოწვეული ექსპერტების რიცხვი. გასულ წელს 33-მა კომპანიამ ისარგებლა სენიორ ექსპერტთა სერვისით. გერმანელი სპეციალისტები წარმოადგენდნენ ისეთ სფეროებს, როგორებიცაა: სოფლის მეურნეობა, მშენებლობა, ადმინისტრაცია და საჯარო მომსახურება, ფინანსები, ჯანდაცვა, პროფესიული სწავლება, უმაღლესი განათლება, ტურიზმი. განსაკუთრებული ყურადღება დაეთმო პროფესიული განათლების სფეროს, სადაც 25 პროექტი განხორციელდა გერმანელი ექსპერტების ჩართულობით.

DWV,  SES-ის პროგრამის ფარგლებში, დუალური პროფესიული სწავლების უფრო ინტენსიურად ხელშეწყობასა და გაძლიერებას გეგმავს. ამ კუთხით, იგეგმება მჭიდრო თანამშრომლობა GIZ-თან და მასწავლებელთა პროფესიული განათლების ეროვნულ ცენტრთან (TPDC), რათა მოხდეს საერთო ინტერესების ოპტიმალური დაკავშირება და პროექტების უფრო ეფექტური წარმართვა.