გერმანიის ეკონომიკური გაერთიანება (DWV) 2024 წლის 24-28 თებერვალს უმასპინძლებს ბიზნეს დელეგაციას გერმანიიდან, რომელიც ინიცირებულია გერმანიის ეკონომიკისა და კლიმატის დაცვის ფედერალური სამინისტროს მიერ და ხორციელდება COMMIT Project Partners GmbH-თან, Mobility & Logistics კლასტერთან, კონსულტანტ ინჟინერთა ასოციაციასთან (VBI)  და აღმოსავლეთის კომიტეტთან (Ost-Ausschuss der Deutschen Wirtschaft) თანამშრომლობით. ბიზნეს დელეგაციის თემაა „ტრანსპორტი და ლოგისტიკა“.

აქტიური ინვესტიციები ინფრასტრუქტურაში, რომლებიც მხარდაჭერილია “ტრანსპორტისა და ლოგისტიკის სექტორის ეროვნული სტრატეგიის 2023-2030” ფარგლებში, საქართველოში დინამიურ განვითარებას უწყობს ხელს, რაც გერმანულ კომპანიებსაც ახალ შესაძლებლობებს უხსნის. ფოთისა და ბათუმის პორტების გაფართოება და დაგეგმილი ღრმაწყლოვანი პორტის პროექტი ანაკლიაში ამასთან ერთად მიმზიდველ პერსპექტივებს ქმნის. ამავდროულად, შუა დერეფანი, როგორც ჩინეთსა და ევროპას შორის ალტერნატიული მარშრუტი, უფრო მეტი ყურადღების ცენტრში ექცევა. თავისი სტრატეგიული მდებარეობის გამო ევროპასა და აზიას შორის, საქართველოს აქვს პოტენციალი, გრძელვადიან პერსპექტივაში ტრანსპორტის საერთაშორისო ჰაბად ჩამოყალიბდეს.

დელეგაციის ფარგლებში გერმანულ კომპანიებს ტრანსპორტის, ლოგისტიკის, საპორტო, სარკინიგზო და გზების მშენებლობის სფეროებიდან ექნებათ შესაძლებლობა შეხვდნენ ქართულ კომპანიებს ამავე სფეროებიდან, რათა დაამყარონ ბიზნეს კავშირები და განიხილონ პარტნიორობის შესაძლებლობები.  პროგრამა მოიცავს ინდივიდუალურად ორგანიზებულ ბიზნეს შეხვედრებს, კომპანიების ვიზიტებს, პრეზენტაციებს და მრავალფეროვან ნეთვორქინგ ღონისძიებებს.