October 2020

თბილისის სატრანსპორტო კომპანიამ, ევროპის რეკონსტრუქციისა და განვითარების ბანკის (EBRD) ხელშეწყობით, 226 ერთეული 12-მეტრიანი, Euro-6-ის სტანდარტის ავტობუსი შეისყიდა, იუწყება თბილისის მერია.

როგორც აღნიშნულია, ავტობუსების ნაწილი უკვე დედაქალაქშია, დანარჩენი კი 2021 წლის მარტამდე ეტაპობრივად შემოვა.
მერიის ცნობით, მუნიციპალური ავტოპარკის განახლების პროექტის ფარგლებში უკვე შემოყვანილია 550 ახალი ავტობუსი; მომავალი წლის პირველ კვარტალში დასრულდება 12-მეტრიანი 130 ავტობუსის შემოყვანა, 2021 წლიდან ასევე დაემატება 18-მეტრიანი 200 ავტობუსი.
ახალი ავტობუსების პირველი ნაკადი 10 სატრანსპორტო დერეფანზე გადანაწილდება, რომლითაც დაიწყება ფრანგული კომპანია Systra-ს მიერ შემუშავებული ახალი სამარშრუტო სქემის ეტაპობრივი დანერგვის პროცესი, აღნიშნავს მერია.
გარდა ავტობუსებისა, პროექტის ფარგლებში შესყიდულია 300 ერთეული Ford-ის მარკის, დიზელის ძრავზე მომუშავე, Euro-5-ის სტანდარტის, მიკროავტობუსი, რომელთა შემოყვანისთვის განსაზღვრულია 180 დღე, იუწყება მერია.
თბილისის მერის კახა კალაძის თქმით, დღეის მდგომარეობით, 200 ერთეული მიკროავტობუსი არის შემოყვანილი. რაც შეეხება თბილისში მოძრავ ყვითელ მიკროავტობუსებს (მარშრუტკებს), ისინი „მართლაც კრიტიკას ვერ უძლებს და ყველანაირი რესურსი ამოწურული აქვს“, აცხადებს ის.
მერის ინფორმაციით, დაახლოებით 3,000 მიკროავტობუსი გადაადგილდებოდა ქალაქში. „ჩვენი სატრანსპორტო პოლიტიკისა და რეფორმის ფარგლებში ეს ციფრი განახლდება და დაახლოებით 1,500-1,200-მდე მიკროავტობუსი იმოძრავებს, რადგან მეტის საჭიროება არ არის“, განაცხადა დღეს კალაძემ.

Sarke Information Agency, 23.10.2020

აღნიშნული გადაწყვეტილების შესაბამისი ცვლილება შევიდა მთავრობის „იზოლაციისა და კარანტინის წესების დამტკიცების შესახებ“ დადგენილებაში.

პირველი ნოემბრიდან რეისები აღდგება თბილისის საერთაშორისო აეროპორტიდან ამსტერდამის, ვენის, ათენის, ბერლინის, დოჰას, მილანისა და ვარშავის მიმართულებით. ქუთაისის საერთაშორისო აეროპორტიდან აღდგება ფრენები ვილნიუსის, კატოვიცესა და დორტმუნდის მიმართულებებით.

სააგენტო „აწარმოე საქართველოში“ World Trade Promotions (WTPO) Awards 2020-ზე საუკეთესო ექსპორტის მხარდამჭერ სააგენტოდ დასახელდა. 14 ოქტომბერს გამართულ ცერემონიაზე, საქართველოსთან ერთად ჯილდოები შვედეთსა და კოსტა რიკასაც გადაეცათ.

წლევანდელი ცერემონიის მთავარი ფოკუსი იყო ექსპორტის განვითარების კუთხით შემუშავებულ ინიციატივებზე. „აწარმოე საქართველოში“ კი ერთ-ერთი იყო 18 ფინალისტ სააგენტოს შორის ისეთი ქვეყნებიდან, როგორებიცაა ავსტრია, ჰოლანდია, ლიეტუვა, პორტუგალია და შვედეთი.

ფინალისტებისა და გამარჯვებული ორგანიზაციების შერჩევის პროცესში ჩართულები არიან საერთაშორისო ექსპერტები ექსპორტისა და ვაჭრობის კუთხით. ღონისძიებას კი წამყვანი კომპანიები და საჯარო დაწესებულებები აკვირდებიან.

„ასეთი დონის საერთაშორისო აღიარება, საქართველოს კიდევ ერთი წარმატებაა, რაც აუცილებლად დადებითად იმოქმედებს ქვეყნის ეკონომიკურ წინსვლაზე” – აცხადებს სააგენტოს „აწარმოე საქართველოში“ დირექტორი, მიხეილ ხიდურელი.

WTPO Awards პრესტიჟული, ტრანსნაციონალური კონკურსია, რომელიც 2004 წელს შეიქმნა ვაჭრობის ხელშემწყობ ორგანიზაციებს შორის საუკეთესოების გამოსავლენად. წელს, ღონისძიებაში 60 ქვეყანა იღებდა მონაწილეობას, რაც უპრენცენდენტოდ მაღალი რიცხვია მთელი ისტორიის მანძილზე.

WTPO Awards-ს ატარებს გაერთიანებული ერებისა და მსოფლიო ვაჭრობის ორგანიზაციის საერთო სააგენტო – საერთაშორისო სავაჭრო ცენტრი. სააგენტო მიზნად ისახავს მცირე და საშუალო ბიზნესის ინტერნაციონალიზაციის მხარდაჭერას და აქტიურად თანამშრომლობს სახელმწიფო სააგენტოებთან ყველა კონტინენტზე.

მსოფლიო ბანკის აღმასრულებელმა საბჭომ 12 მილიარდი დოლარის ოდენობის ფინანსური რესურსი დაამტკიცა განვითარებადი ქვეყნებისთვის COVID-19-ის ვაქცინების ყიდვისა და გავრცელებისთვის, ტესტირებისა და მკურნალობისთვის. მსოფლიო ბანკის ანგარიშში ვკითხულობთ:

დაფინანსება, რომელიც მილიარდი ადამიანისთვის საჭირო ვაქცინაციის შეძენას უნდა მოხმარდეს, მსოფლიო ბანკის ჯგუფის საერთო პაკეტის ნაწილია. აღნიშნული პაკეტი $160 მილიარდი ოდენობისაა და განვითარებად ქვეყნებში პანდემიასთან ბრძოლისთვის არის გამოყოფილი. მსოფლიო ბანკის ეს პროგრამა მსოფლიოს 111 ქვეყანას მოიცავს.

მსოფლიო ბანკის განცხადებით, დაფინანსების ეს პაკეტი კვლევით და ფარმაციის ინდუსტრიას ანიშნებს, რომ განვითარებადი ქვეყნების მოსახლეობა ასევე საჭიროებს COVID-19-ის ვაქცინებზე წვდომას. გარდა ამისა, განხორციელდება ფინანსური და ტექნიკური დახმარება, რათა განვითარებადმა ქვეყნებმა საერთაშორისო პარტნიორებთან კოორდინაციით შეძლონ ვაქცინების ფართომასშტაბიანი გამოყენებისათვის მომზადება. პროგრამის განხორციელებისას მსოფლიო ბანკი მხარს დაუჭერს მრავალმხრივ ძალისხმევას, რომელსაც ამჟამად ჯანდაცვის მსოფლიო ორგანიზაცია და COVAX ხელმძღვანელობენ.

„ჩვენ ვაფართოებთ დაჩქარებულ მიდგომას კორონავირუსით გამოწვეულ საგანგებო სიტუაციაზე რეაგირების კუთხით, რათა განვითარებად ქვეყნებს ვაქცინაზე სამართლიანი და თანაბარი წვდომა ჰქონდეთ” – აღნიშნა მსოფლიო ბანკის ჯგუფის პრეზიდენტმა, დევიდ მალპასმა. „უსაფრთხო და ეფექტიანი ვაქცინაზე წვდომა არის საკვანძო პანდემიის წინააღმდეგ ბრძოლაში, რითიც შესაძლებელია ქვეყნებს დამანგრეველი ეკონომიკური და ფისკალური შედეგებთან გამკლავებაში დავეხმაროთ”.

საქართველოს პრემიერ-მინისტრის, გიორგი გახარიას განცხადებით, ნოემბრიდან საქართველოს მიმართულებით და საქართველოდან რეისები ეტაპობრივად აღდგება.

როგორც გიორგი გახარიამ აღნიშნა, პირველ რიგში, ოქტრომბრის ბოლოდან ფრენები დაემატება არსებულ რეისებზე – პარიზისა და მიუნხენის მიმართულებით. ნოემბერში ეტაპობრივად პირდაპირი რეისები გაიხსნება, როგორც თბილისიდან, ასევე ქუთაისიდან ევროპის მიმართულებით.

1. კომპანიები მაქსიმალურად უნდა გადაერთონ მუშაობის დისტანციურ რეჟიმზე

საქართველოს პრემიერ-მინისტრი, გიორგი გახარია კერძო და საჯარო ორგანიზაციებს მოუწოდებს, თანამშრომლები მაქსიმალურად დისტანციურ მუშაობაზე გადაიყვანონ. მისი თქმით, ეს არის რეკომენდაცია, რომელიც შეძლებისდაგვარად ყველა ორგანიზაციამ უნდა გაითვალისწინოს.
„მინდა ხაზი გავუსვა კერძო და საჯარო ორგანიზაციების პასუხისმგებლობას -მაქსიმალურად დისტანციურ სამუშაოზე უნდა გადავიდეთ ყველა, სადაც ამის შესაძლებლობა არსებობს. ეს მხოლოდ რეკომენდაციაა, თუმცა ყველა ორგანიზაციამ და კომპანიამ საკუთარი სოციალური პასუხისმგებლობა უნდა გაითვალისწინოს” – განაცხადა გახარიამ.

2. თბილისში და იმერეთში 10 საათიდან კომენდანტის საათი გამოცხადდა რესტორნების, ბარებისა და ყველა გასართობი ობიექტისთვის

„ გადავწყვიტეთ, რომ 16 ოქტომბრიდან თბილისსა და იმერეთში რესტორნები და გასართობი დაწესებულებები შეიზღუდება 22:00 საათიდან” – აცხადებს გიორგი გახარია.

საქართველოს პრემიერ-მინისტრის განცხადებით, საქართველოში შემოსული მოქალაქეებისთვის 8 დღიანი კარანტინი აღარ იქნება სავალდებულო, თუმცა ისნი 12 დღე თვითიზოლაციაში უნდა დარჩნენ. თუმცა, ვისაც არ ექნება PCR ტესტის პასუხი, შეეძლება საკარანტინე სივრცეების გამოყენება.

გიორგი გახარიამ აღნიშნა, რომ მას შემდეგ, რაც დაემატება და გაიხსნება დამატებითი ფრენები, მოქალაქეების კარანტინში გადაყვანის სქემა შეიცვლება.

გერმანიამ საქართველოს COVID-19-ით დაავადებული პაციენტების სამკურნალოდ Draeger ფირმის 5 სასუნთქი აპარატი აჩუქა.

აპარატები გერმანიის საგარეო საქმეთა სამინისტროს ფონდიდან შეიძინეს, ფონდი განკუთვნილია COVID-19-ის პანდემიის დროს აღმოსავლეთ პარტნიორობის ქვეყნების მხარდასაჭერად.

სასუნთქი აპარატები ინფექციური პათოლოგიის, შიდსის და კლინიკური იმუნოლოგიის ცენტრში განთავსდება.

უწყებათაშორისი საკოორდინაციო საბჭო მოქალაქეებსა და ორგანიზაციებს მოუწოდებს, მაქსიმალურად შეასრულონ საზოგადოებრივი ჯანდაცვის სფეროს სპეციალისტების რჩევები, ატარონ პირბადე, დაიცვან სოციალური დისტანცია და მაქსიმალურად შეინარჩუნონ მუშაობის დისტანციური რეჟიმი.

საბჭო რეკომენდაციით მიმართავს ხანდაზმულებს, გადაუდებელი აუცილებლობის შემთხვევების გარდა, მაქსიმალურად დარჩნენ სახლში. ასევე, იმის გათვალისწინებით, რომ დედაქალაქში მობილობა განსაკუთრებით მაღალია და ვირუსიც შესაძლოა უფრო სწრაფად გავრცელდეს, საბჭოს რეკომენდაციაა, მოქალაქეებმა პირბადე ღია სივრცეებშიც ატარონ, რამდენადაც ის მსოფლიოში ამ ეტაპზე თავდაცვის საუკეთესო საშუალებად მიიჩნევა.

საბჭომ განიხილა სკოლებში სასწავლო პროცესის მიმდინარეობა და მდგომარეობა საბავშვო ბაღებში, სადაც სააღმზრდელო პროცესი დღეიდან განახლდა. აღინიშნა, რომ ცალკეულ შემთხვევებში გამოვლენილ ინფიცირების შემთხვევებთან მიმართებაში, როგორც სკოლებში, ისე ბაღებში, დაუყოვნებლივ ლოკალურად გატარდა შესაბამისი ღონისძიებები და აღნიშნული მიდგომა შენარჩუნდება.

საქართველოს მთავრობამ დაამტკიცა დადგენილება, რომლითაც განსაზღვრულია, თუ რა შემთხვევაში შეიძლება მიიღონ ქვეყანაში მოქმედმა უცხოურმა კომპანიებმა “საერთაშორისო კომპანიის” სტატუსი და ამ სტატუსის თანმდევი საგადასახადო შეღავათები.

ამ სტატუსის მქონე საწარმოებისთვის მოგებისა და საშემოსავლო გადასახადები 15%-ისა და 20%-ის ნაცვლად იქნება 5%.

ფინანსთა მინისტრის ივანე მაჭავარიანის განცხადებით, შეღავათებით ისარგებლებენ IT და საზღვაო სფეროში ჩართული საერთაშორისო კომპანიები, რომლებიც საკუთარ სერვისს უცხოეთში ყიდიან.

“IT სფეროს რაც შეეხება, დაწყებული პროგრამული უზრუნველყოფის გამოცემით, ნებისმიერი ციფრული პროდუქტის დამზადება და მთელი რიგი ჩამონათვალია. რაც შეეხება საზღვაო სერვისებს, აქაც დიდი სიაა, მათ შორის გემის გაქირავება ეკიპაჟიანად, ან უეკიპაჟოდ, რეისის დაგეგმვა და ანალიზი, გემის ფიზიკურ მდგომარეობაზე ზედამხედველობა, საკვების პროდუქტებით ან ტექნიკური დეტალებით მომარაგება და ა.შ. ეს არის საქმიანობები, რომელიც საქართველოს მთავრობამ ამ დადგენილებით დასაშვებად ცნობს“,- აცხადებს ფინანსთა მინისტრი.

საქართველოს მთავრობა ამ საგადასახადო ცვლილებების მიღებაზე ორ წელზე მეტი ხნის განმავლობაში მუშაობდა და ის თავდაპირველად ყოფილმა პრემიერ-მინისტრმა მამუკა ბახტაძემ დააანონსა.

იმუშავე საქართველოდან“ არის ინოვაციური პროექტი, რომელიც საქართველოს მთავრობამ შეიმუშავა კოვიდ პანდემიის დროს, რომ მოხდეს ტურიზმის ინდუსტრიის სტიმულირება და წახალისება.

პროექტის მიზანია მხარჯველუნარიანი ტურისტების უსაფრთხოდ მოზიდვა სტრატეგიული ქვეყნებიდან რომლებიც შედარებით გრძელი ვადით იცხოვრებენ და დისტანციურად იმუშავებენ საქართველოდან.

„იმუშავე საქართველოდან“ პროექტის შესახებ სტატიები მომზადდა ისეთ გავლენიან გამოცემებში, როგორიცაა, New York Times, Forbes, Insider და სხვ.

როგორც ტურიზმის ეროვნული ადმინისტრაციის ინფორმაციაშია აღნიშნული, „იმუშავე საქართველოდან“ პროექტის ფარგლებში საქართველოს უკვე ეწვია აშშ-ის, ავსტრალიის, დიდი ბრიტანეთის, რუსეთის, უკრაინის, ახალი ზელანდიის, კანადის 83 მოქალაქე. ვიზიტორები საქართველოში ხანგრძლივი პერიოდით დარჩებიან და დისტანციურად იმუშავებენ.

„იმუშავე საქართველოდან“ პროექტის ფარგლებში საქართველოში ჩამოსვლის მსურველები.

1 ოქტომბერს გერმანიის საგარეო საქმეთა სამინისტრომ გააუქმა მოგზაურობაზე გლობალური შეზღუდვების რეკომენდაციები, რომლებიც მსოფლიოს უმეტესი ქვეყნებისთვის იყო დაწესებული.

1 ოქტომბერს გერმანიის საგარეო საქმეთა სამინისტრომ გააუქმა მოგზაურობაზე გლობალური შეზღუდვების რეკომენდაციები, რომლებიც მსოფლიოს უმეტესი ქვეყნებისთვის იყო დაწესებული. ამიტომ საქართველოსთან მიმართებაშიც ძალაში იქნება განსხვავებული მითითებები: 

თუმცა მსოფლიოში კოვიდ-19 პანდემიის დინამიური განვითარების ფონზე შესაძლებელია გარკვეული ქვეყანა კვლავ შეფასდეს რისკის ზონად, თუ იქ ახალი ინფექციების რაოდენობა 100.000 მოსახლეზე ბოლო 7 დღის განმავლობაში ჯამში ორმოცდაათს გადააჭარბებს. ამის შედეგად შესაძლებელია მოგზაურობაზე ახალი გამაფრთხილებელი რეკომენდაციები დაწესდეს.

გერმანიის საელჩო თბილისი, 01.10.2020

გერმანიის ეროვნულ დღესასწაულს – გაერთიანების დღეს გერმანიის ეკონომიკური გაერთიანება ულოცავს ყველა გერმანელსა და ქართველს, ვისთვისაც ეს თარიღი მნიშვნელოვანია.

ამ დღესთან დაკავშირებით, გერმანიის საელჩომ თბილისში მოამზადა ფილმი, რომელშიც საქართველოში მცხოვრები გერმანელები საუბრობენ.

ფილმის სანახავად მიჰყევით ბმულს.