April 2020

შვედეთმა, ავსტრიამ და ევროკავშირმა ორგანული სოფლის მეურნეობის სექტორში 1.16 მილიონი EUR გამოყო. პროექტ GRETA-ს ფარგლებში გამოცხადებულია საგრანტო კონკურსი, რომელიც მიზნად ისახავს სვანეთის, რაჭა-ლეჩხუმის და ზემო იმერეთის რეგიონებში ორგანულ სოფლის მეურნეობაში ადგილობრივი განვითარების ინიციატივების ხელშეწყობას.

მხარდაჭერის მოცულობის დიაპაზონია 5,000-დან 150,000 ლარამდე. აპლიკანტის მხრიდან თანადაფინანსება უნდა შეადგენდეს მთლიანი ბიუჯეტის მინიმუმ 10%-ს. განაცხადების შეტანის ბოლო ვადაა მიმდინარე წლის 25 მაისი. სააპლიკაციო ფორმა შეგიძლიათ იხილოთ ამ ბმულზე

საინფორმაციო სააგენტო სარკე, 30.04.2020

GIAC და ინიციატივა Resolve ბიზნესის მხარდაჭერის ერთობლივ პროექტს იწყებენ, რომელიც ევროკავშირისა და გაეროს განვითარების პროგრამის (UNDP) დახმარებით განხორციელდება.

პროექტის მიზანია დავების პრევენციის, მართვისა და მოგვარების სხვადასხვა პროცესების ხელმისაწვდომობა COVID19-ის ზეგავლენის ქვეშ მოქცეული ქართული ბიზნესისთვის პანდემიით გამოწვეული გამოწვევების დაძლევის მიზნით.

დამატებითი ინფორმაცია იხილეთ აქ.

ინვესტორთა საბჭოს წევრები საქართველოს მთავრობას ახალი საინვესტიციო სტრატეგიის შემუშავებაში დაეხმარებიან, – ამის შესახებ ინვესტორთა საბჭოს სხდომაზე იმსჯელეს, რომელიც ვიცე-პრემიერის, რეგიონული განვითარებისა და ინფრასტრუქტურის მინისტრ მაია ცქიტიშვილის ხელმძღვანელობით, ვიდეოკონფერენციის ფორმატში გაიმართა.

ინვესტორთა საბჭოს წევრები საქართველოს მთავრობასთან ერთად ჩაერთვებიან იმ ნაბიჯების შემუშავების პროცესში, რომლებიც საქართველოში ახალი უცხოური ინვესტიციების მოზიდვისთვის უნდა გადაიდგას. საბჭოს სხვა წევრებთან ერთად, გერმანიის ეკონომიკურმა გაერთიანებამ აქტიური მონაწილეობა მიიღო სხდომაზე გამართულ დისკუსიაში.

ვიდეოკონფერენციისას განიხილეს გლობალური პანდემიით გამოწვეული ზოგადო ეკონომიკური ტენდენციები და საქართველოში ამ კუთხით არსებული მდგომარეობა, ასევე ანტიკრიზისული გეგმის შემდეგი ეტაპით გათვალისწინებული ღონისძიებები, რომელსაც საქართველოს ხელისუფლება პარასკევს წარადგენს.

საუბარი ასევე შეეხო ანტიკრიზისული გეგმის ფარგლებში ეტაპობრივად მიღებულ ზომებს. ვიცე-პრემიერმა კიდევ ერთხელ მადლობა გადაუხადა საერთაშორისო ფინანსურ ინსტიტუტებსა და დონორ ორგანიზაციებს, რომლებთან მჭიდრო თანამშრომლობითაც შესაძლებელი გახდა ქვეყნის ეკონომიკისთვის 3 მილიარდ აშშ დოლარზე მეტი ფინანსური რესურსის მოზიდვა.

ინვესტორთა საბჭოს სხდომაზე მნიშვნელოვანი აქცენტი გაკეთდა პოსტკრიზისულ პერიოდში ეკონომიკის ხელშემწყობ მექანიზმებზე. აღინიშნა, რომ ხელისუფლება, ისევე, როგორც ანტიკრიზისული ნაბიჯებისას, თანმიმდევრული იქნება პოსტკრიზისული გეგმის შემუშავების პროცესში და საერთაშორისო პარტნიორებთან აქტიურ კოორდინაციას განაგრძობს.

ინვესტორთა საბჭომ ასევე იმსჯელა, რა ნაბიჯები უნდა გადადგას საქართველომ ეპიდემიასთან ბრძოლის შემდგომ ეტაპზე მსოფლიო ეკონომიკის გლობალურ კონკურენციაში თავისი ადგილის დასაკავებლად და ამავდროულად ისარგებლოს შესაძლებლობით, რათა განავითაროს ახალი დარგები საქართველოში და მოიზიდოს კიდევ უფრო მეტი უცხოური ინვესტიცია.

„საქართველოს მთავრობის მხარდაჭერა ეკონომიკის ეტაპობრივ გახსნაში და კერძო სექტორისთვის ყველაზე აქტუალური საკითხების მოგვარებაში ჩვენი ერთ-ერთი პრიორიტეტია, რათა მინიმუმამდე იყოს დაყვანილი კრიზისის გავლენა კერძო სექტორსა და ეკონომიკაზე. ასეთ დროს საჯარო და კერძო სექტორებს შორის თანამშრომლობის პლატფორმის უზრუნველყოფა ინვესტორთა საბჭოს ფარგლებში ძალიან მნიშვნელოვანია. მადლობას ვუხდი ჩვენს ყველა წევრს ნაკისრი ვალდებულებისა და თანამშრომლობისთვის”, – განაცხადა ინვესტორთა საბჭოს მდივანმა გიორგი ჩერქეზიშვილმა.

„არსებული კრიზისის პირობებში ხელისუფლებასა და ბიზნეს სუბიექტებს შორის ეფექტური კომუნიკაცია უაღრესად მნიშნველოვანია ეკონომიკის ეტაპობრივი გახსნისთვის, როდესაც ჯანდაცვის სფეროში მდგომარეობა ამის შესაძლებლობას მოგვცემს. ამ მიმართულებით საქართველოს მთავრობისა და კერძო სექტორის მხრიდან აქტიურ ჩართულობას ვხედავთ. ასეთ რთულ დროს მომავალზე ფიქრიც მნიშვნელოვანი ხდება. პირდაპირი უცხოური ინვესტიციების მიმართ მოლოდინი სავარაუდოდ შეიცვლება და საქართველო კაპიტალიზაციას შეძლებს წარმოქმნილი სხვადასხვა კონკურენტული უპირატესობის გამოყენებით. ინვესტორთა საბჭო სამუშაო ჯგუფებს შექმნის ამ პროცესის ხელშესაწყობად”, – განაცხადა ევროპის რეკონსტრუქციისა და განვითარების ბანკის(EBRD) კავკასიის რეგიონულმა დირექტორმა კატარინა ბიორლინ ჰანსენმა.

წყარო: commersant.ge

საერთაშორისო საარბიტრაჟო ტრიბუნალმა, ამერიკულ ნავთობკომპანია Frontera-სთან დავაში მხარი დაუჭირა ქართული მხარის „კონტრაქტის ნორმათა ინტერპრეტაციას და მათი სასარჩელო მოთხოვნების აბსოლუტური უმრავლესობა დააკმაყოფილა“, იუწყება საქართველოს ნავთობისა და გაზის კორპორაცია.

კორპორაციის ინფორმაციით, გადაწყვეტილება, რომელიც 1997 წლის 25 ივნისის პროდუქციის წილობრივი განაწილების კონტრაქტიდან გამომდინარეობს, გამოტანილ იქნა მიმდინარე წლის 17 აპრილს.

საარბიტრაჟო ტრიბუნალმა დაადგინა, რომ Frontera Resourses Georgia-მ არსებითად დაარღვია კონტრაქტი, რაც ძებნა-ძიების ფართობის სახელმწიფოსთვის დაბრუნებაზე უარის თქმაში გამოიხატა, იუწყება კორპორაცია.

გადაწყვეტილების მიხედვით, Frontera-ს დაევალა კორპორაციის მიერ გადახდილი ბუნებრივი რესურსებით სარგებლობის მოსაკრებლის თანხა და ასევე, მოსარჩელეების (კორპორაცია და საქართველოს ნავთობისა და გაზის სახელმწიფო სააგენტო) მიერ საარბიტრაჟო წარმოებასთან დაკავშირებით გაწეული ხარჯები აანაზღაუროს.

საარბიტრაჟო ტრიბუნალმა, აგრეთვე, დააკმაყოფილა შუამდგომლობა Frontera-ს შეგებებული სასარჩელო მოთხოვნების გამოთხოვის თაობაზე და ამ მოთხოვნებთან დაკავშირებით წარმოება შეწყვიტა, იუწყება კორპორაცია და აღნიშნავს, რომ კონტრაქტის მიხედვით, საარბიტრაჟო ტრიბუნალის გადაწყვეტილება საბოლოოა.

საინფორმაციო სააგენტო სარკე, 23.04.2020

ბიზნესის წარმომადგენლებმა, რომლებიც მთავრობის დადგენილებით, საგანგებო პერიოდის დროს, ეკონომიკური საქმიანობის გასაგრძელებლად სპეციალურ ნებართვებს საჭიროებენ, შესაბამისი განაცხადის ფორმა უნდა შეავსონ.

• სარეგისტრაციო ფორმა მეწარმე სუბიექტებისათვის (გარდა სამშენებლო კომპანიებისა) – 
• სარეგისტრაციო ფორმა სამშენებლო კომპანიებისთვის – 
• სარეგისტრაციო ფორმა სამშენებლო მასალების და საბითუმო ვაჭრობის მწარმოებელი კომპანიებისთვის –

ელ-ფოსტა: construction(at)moesd.gov.ge

ორი კვირის მანძილზე 6 ქართულმა საწარმომ უკვე 1 მილიონი პირბადე დაამზადა, იუწყება მთავრობის ადმინისტრაცია. როგორც აღნიშნულია, მათ შორისაა აჭარა ტექსტილი, სადაც 3,200 ადამიანია დასაქმებული.

მთავრობის ადმინისტრაციის ინფორმაციით, 6 აპრილიდან პირბადეების დამზადებას კიდევ 2 საწარმო დაიწყებს.

როგორც აღნიშნულია, საქართველოში წარმოებული პირბადეები უპირველეს ყოვლისა უფასოდ დაურიგდათ 70 წელს გადაცილებული ქრონიკული დაავადებების მქონე პენსიონერებს, შემდეგ – ჯანდაცვის სექტორს, საპატრულო პოლიციას, მებაჟეებსა და სასურსათო ქსელებში დასაქმებულებს. მომდევნო ეტაპზე კი ფარმაცევტული ქსელების (ავერსი, GPC, PSP, ფარმადეპო) მომარაგება იგეგმება.

თავის მხრივ, ეკონომიკისა და მდგრადი განვითარების სამინისტროს ინფორმაციის თანახმად, სამედიცინო ხალათებისა და კომბინიზონების წარმოება ქართულმა კომპანია Dr.Goods-მა გააფართოვა.

საწარმო, სადაც მომუშავეთა რაოდენობა ამჟამად 5-დან 70-მდე გაიზარდა, დღე-ღამეში 10,000-მდე ხალათსა და 2,000-მდე სამედიცინო კომბინიზონს აწარმოებს, იუწყება სამინისტრო.

როგორც აღნიშნულია, Dr.Goods 2019 წლის სექტემბერში დაფუძნდა სტარტაპ საქართველოს და საპარტნიორო ფონდის კონტრიბუციით, ხოლო რამდენიმე კვირის წინ კი პროგრამის „აწარმოე საქართველოში“ დახმარებით TBC ბანკის სესხი მიიღო წარმოების გასაფართოებლად. კერძოდ, საწარმომ 60,000 ლარამდე ინვესტიცია განახორციელა და დამატებით 32 საკერავი მანქანა შეიძინა, იუწყება სამინისტრო.

საინფორმაციო სააგენტო სარკე, 7 აპრილი, 2020