November 2020

საქართველოს მთავრობამ მიიღო გადაწყვეტილება, რომ 28 ნოემბრიდან ძალაში შედის ახალი შეზღუდვები, რომლებიც ძალაშია 31 იანვრამდე გარკვეული გამონაკლისებით.

შეზღუდვების ნაწილი მოქმედებს მთელი ქვეყნის მასშტაბით. ესენია:

• გადაადგილების შეზღუდვა – 21 საათიდან 5 საათამდე. გამონაკლისია 31 დეკემბერი და 6 იანვარი.
• მგზავრების რეგულარული საქალაქთაშორისო გადაყვანა – რკინიგზით, ავტობუსით, სამარშრუტო ტაქსით. მსუბუქ ავტომობილებზე და ტაქსებზე არ წესდება შეზღუდვა; აღდგება 24 დეკემბერი – 2 იანვრის პერიოდსა და 16 იანვარი – 31 იანვრის პერიოდში.
• რესტორნები და კვების ობიექტები – იხურება და მთლიანად გადადის გატანის სერვისზე;
• ფიტნეს დარბაზებისა და საცურაო აუზები – იხურება;
• 28 ნოემბრიდან 31 იანვრის ჩათვლით ზამთრის კურორტები იხურება.
• კონფერენციის, ტრეინინგის, კულტურული, გასართობი ღონისძიებების ჩატარება – დასაშვებია მხოლოდ ონლაინ ფორმატით
• სპორტული, სახელოვნებო და კულტურული წრეების/სტუდიების საქმიანობა ჩერდება

უფრო მკაცრია შეზღუდვების მეორე ნაწილი შემდეგი ქალაქებისთვის: თბილისი, ბათუმი, ქუთაისი, რუსთავში, გორი, ფოთი, ზუგდიდი, თელავი

• სავაჭრო ობიექტები (გარდა სურსათის, ცხოველების საკვების, აფთიაქების, ვეტაფთიაქის, საყოფაცხოვრებო ქიმიისა და ჰიგიენის მაღაზიებისა და პრესის ჯიხურებისა) მუშაობენ მხოლოდ დისტანციურ რეჟიმში. მუშაობა აღდგება 24 დეკემბერი – 2 იანვრის პერიოდსა და 16 იანვარი – 31 იანვრის პერიოდში.
• ჩერდება მუნიციპალური ტრანსპორტი. აღდგება 24 დეკემბერი – 2 იანვრის პერიოდსა და 16 იანვარი – 31 იანვრის პერიოდში.
• ღია და დახურული ბაზრობები – იხურება. ფუნქციონირებას აგრძელებენ აგრარული ბაზრები; მუშაობა აღდგება 24 დეკემბერი – 2 იანვრის პერიოდსა და 16 იანვარი – 31 იანვრის პერიოდში.
• სკოლები, პროფსასწავლებლები და უმაღლესი საგანმანათლებლო დაწესებულებები (გარდა სამედიცინო საგანმანათლებლო პროგრამებისა) სრულად გადადიან დისტანციურ რეჟიმზე;
• კერძო და საჯარო საბავშვო ბაღები აჩერებენ მუშაობას.

წესის დარღვევისთვის გათვალისწინებულია ჯარიმა 2000 ლარის ოდენობით.

• 3-15 იანვარის პერიოდში ქვეყნის მასშტაბით ცხადდება დასვენების დღეები.

მნიშვნელოვანია, რომ 16-31 იანვრის პერიოდში შაბათ-კვირას ტრანსპორტი, სავაჭრო ობიექტები და ბაზრობები აჩერებენ მუშაობას.

შეზღუდვები არ ეხება შემდეგ ეკონომიკურ საქმიანობებს:

• სახელმწიფო და კერძო სამშენებლო-სარემონტო საქმიანობას;
• საბანკო და საფინანსო საქმიანობას;
• სურსათის, ცხოველების საკვების, აფთიაქების, ვეტაფთიაქის, საყოფაცხოვრებო ქიმიისა და ჰიგიენის მაღაზიების და პრესის ჯიხურების მუშაობას;
• დელივერსა და გატანის სერვისებს;
• სილამაზის სალონებისა და ესთეტიკური მედიცინის ცენტრების მუშაობას;
• ავტოტექმომსახურებისა და ტექნიკური ინსპექტირების სერვისებს;
• საყოფაცხოვრებო ტექნიკის სარემონტო სერვისებს;
• აგრარული ბაზრობის მუშაობას

მთავრობა ქმნის უცხოური საინვესტიციო პროექტების დაფინანსების ახალ პროგრამას, რომელიც პროგრამის “აწარმოე საქართველოში” ფარგლებში განხორციელდება. პროგრამის მიზანია ქვეყანაში პირდაპირი უცხოური ინვესტიციების ზრდის, ტექნოლოგიების შემოდინებისა და ახალი სამუშაო ადგილების შექმნის მხარდაჭერა.

პროგრამა „FDI გრანტის“ ფარგლებში დაფინანსება შეეხება შემდეგ სექტორებს:

• ელექტრული და ელექტრონული ინჟინერიის პროდუქციის წარმოება;
• სატრანსპორტო საშუალებების და მათი ნაწილების წარმოება;
• მანქანების და მოწყობილობების (მანქანადანადგარები) ასევე მათი ნაწილების წარმოება;
• ექსპორტზე ორიენტირებული ბიზნეს სერვისების/პროცესების აუთსორსინგი (BPO), რომელიც გულისხმობს საქართველოდან სხვა უცხოურ ბაზარზე მომსახურების მიწოდებას/აუთსორსინგს;
• დასაწყობება და ლოგისტიკური ცენტრების შექმნა, საჰაერო ხომალდების რემონტი და ტექნიკური მომსახურება (MRO)

ამასთანავე, უცხოურმა კომპანიებმა შემდეგი კრიტერიუმები უნდა დააკმაყოფილონ:

• საინვესტიციო პროექტი მინიმუმ 10 მლნ. ლარის ოდენობით (დაახლ. 3 მლნ. USD)
• მინიმუმ 150 სამუშაო ადგილის შექმნა
• სერვისების/პროცესების აუთსორსინგის სფეროში (BPO) მოღვაწე კომპანიებისთვის ინვესტიციის მინიმალური ოდენობა 5 მლნ. ლარით (დაახლ. 1,5 მლნ. USD) განისაზღვრება. ამ შემთხვევაში მინიმუმ 200 ახალი სამუშაო ადგილი უნდა შეიქმნას.

განცხადების თანახმად, კომპანიები მიიღებენ გრანტს 1 მილიონ ლარამდე, თუ ისინი დააკმაყოფილებენ კრიტერიუმებს (დაახლ. 300.000 USD). კომპანიებმა, რომელთაც პროგრამაზე განაცხადის წარდგენა სურთ, უნდა წარუდგინონ განაცხადი Enterprise Georgia-ს. ამის შემდეგ სააგენტოსა და ინვესტორს შორის იდება შესაბამისი ხელშეკრულება, რომლის მეშვეობითაც ინვესტორი აიღებს საინვესტიციო ვალდებულებას და იწყებს პროექტის განხორციელებას, რომლის მაქსიმალური ხანგრძლივობაა 39 კვირაა.

მოხარულები ვართ გაცნობოთ, რომ – საქართველოს პასუხისმგებელი ბიზნესის კონკურსი Meliora 2020 განაცხადების მიღებას იწყებს!

Meliora – საქართველოში ყველაზე გამორჩეული ჯილდო ბიზნეს კომპანიებს მათ მიერ განხორციელებული კორპორაციული სოციალური პასუხისმგებლობის (CSR) ინიციატივებისათვის აჯილდოვებს. კონკურსი მიზნად ისახავს საქართველოში კორპორაციული სოციალური პასუხისმგებლობის განვითარებას და  საზოგადოებაში ცნების პოპულარიზაციას, კომპანიების წახალისებას დანერგონ საკუთარ საქმიანობაში CSR-პრინციპები და მიდგომები და გახდნენ სამაგალითო სხვებისთვის.

Meliora – „საქართველოს სტრატეგიული კვლევებისა და განვითარების ცენტრის“ (CSRDG) ორგანიზებით, ევროკავშირისა და კონრად ადენაუერის ფონდის (KAS) მხარდაჭერით ტარდება.

Meliora 2020 – ეძღვნება იმ პროექტებსა თუ ინიციატივებს, რომლებიც კომპანიებმა თავიანთი კორპორაციული სოციალური პასუხისმგებლობის (CSR) ფარგლებში განახორციელეს Covid 19-თან საბრძოლველად.

კონკურსში მონაწილეობა ნებისმიერი ზომის კომპანიას შემდეგ კატეგორიებში შეუძლია:

• თანამშრომელთა მხარდაჭერა COVID-19-ის პანდემიის პერიოდში
• მომხმარებელთა და მომწოდებელთა მხარდაჭერა COVID-19-ის პანდემიის პერიოდში
• საზოგადოების მხარდაჭერა COVID-19 -ის პანდემიის პერიოდში
• მცირე ბიზნესის და დაზარალებული სექტორების მხარდაჭერა COVID-19-ის პანდემიის პერიოდში

წამყვანი ქართველი და უცხოელი  ექსპერტებისგან შემდგარი დამოუკიდებელი ჟიური შეაფასებს ნომინანტებს და გამოავლენს საუკეთესოებს CSR-ინიციატივების სათანადოდ დაგეგმვის,  თანმიმდევრულობის, ეფექტურობისა და შედეგების მდგრადობის მიხედვით.

განაცხადების მიღების ბოლო ვადაა 7 დეკემბერი.

გამარჯვებულები 2021 წლის გაზაფხულზე გამოვლინდებიან.

კონკურსი უნიკალურ შესაძლებლობას სთავაზობს ბიზნესკომპანიებს გააცნონ საზოგადოებას თავიანთი CSR პროექტები და მოიპოვონ აღიარება.  Meliora – 2018 წელს, კორპორაციული პასუხისმგებლობის განვითარებაზე ორიენტირებული  ბიზნესასოციაციების, საერთაშორისო და ადგილობრივი საექსპერტო და საზოგადოებრივი ორგანიზაციების მხარდაჭერით დაფუძნდა. ამ ორი წლის განმავლობაში კონკურსში მონაწილეობა სხვადასხვა მსხვილმა და მცირე/საშუალო კომპანიამ 140-მდე განხორციელებული CSR პროექტით მიიღო.

კონკურსის შესახებ დეტალური ინფორმაცია ვებ-გვერდზე www.meliora.ge არის განთავსებული.

საკონტაქტი პირი

სალომე თოფურიძე

CSRDG-ის საზოგადოებასთან ურთიერთობის ექსპერტი

599326555 – salometopuridze@csrdg.ge

სამიზნე აუდიტორია: კომპანიების იურიდიული, საფინანსო და ადამიანური რესურსების სამსახურებისა და მმართველი რგოლის წარმომადგენლები.

ტრენერები: სერგი ჯორბენაძე, გელა მღებრიშვილი, სალომე არღვლიანი, დავით ქარდავა.

ტრენინგების გეგმა:

2 დეკემბერი, 2020 – შრომის სამართლის სიახლეები კანონმდებლობასა და პრაქტიკაში
განსახილველი საკითხები: შრომითი ხელშეკრულების მოწესრიგება, დისკრიმინაცია, „სახელფასო კომპონენტები“, შრომითი ხელშეკრულების შეწყვეტა, შრომითი ურთიერთობის კავშირი სხვა, ბიზნესთან დაკავშირებულ დარგებთან.

9 დეკემბერი, 2020 – დღგ-ს დაბეგვრის ახალი რეგულაციები
განსახილველი საკითხები: ცვლილებების არსი და მიზანი,არსებული ტერმინთა განმარტებები და ახალი ტერმინების მიმოხილვა, დღგ-თი დასაბეგრ ოპერაციებსა და სხვადასხვა საგადახადო ოპერაციაში შესული ცვლილებები.

16 დეკემბერი, 2020 – რეკრუტინგი საერთაშორისო სტანდარტების შესაბამისად: ISO 30405, ISO 10667 1/2
განსახილველი საკითხები: ISO სტანდარტი, ISO HR მართვაში, ISO 30405 – რეკრუტინგის სახელმძღვანელო, ISO 10667 1/2 – შეფასების სისტემა რეკრუტინგში.

23 დეკემბერი, 2020 – რა გვასწავლა პანდემიამ? სტრატეგიული რესტრუქტურიზაცია ახალ რეალობასთან გასამკლავებლად
განსახილველი საკითხები: COVID-19-ის ზეგავლენა ბიზნესზე: წარმატებული და წარუმატებელი მაგალითები საქართველოს ბიზნეს სექტორიდან, ახალი რეალობის გათვალისწინებით კომპანიის შიდა რესურსების გადაფასება VRIO-მეთოდოლოგიის მეშვეობით (ქეისი), სტრატეგიული რესტრუქტურიზაცია ახალ რეალობაში (ქეისი).

ტრენინგების ხანგრძლივობა: 11:00-დან 15:00-მდე, 30 წუთიანი შესვენებით.

ადგილი: Microsoft Teams

ტრენინგების საფასური

ტრენინგების ცალ-ცალკე შეძენის შემთხევაში – გერმანიის ეკონომიკური გაერთიანების (DWV) წევრებისთვის – 120 ლარი, არაწევრებისთვის – 150 ლარი (დღგ-ს ჩათვლით).
სარეგისტრაციო ფორმა: https://forms.gle/aXpFcmKvVU5AHUhS7

ტრენინგების პაკეტის (ყველა ტრენინგი) შეძენის შემთხვევაში – გერმანიის ეკონომიკური გაერთიანების (DWV) წევრებისთვის – 380 ლარი, არაწევრებისთვის – 480 ლარი (დღგ-ს ჩათვლით).
სარეგისტრაციო ფორმა: https://forms.gle/3Fjbyx1WZwwkbxir5

ტრენინგები ჩატარდება ქართულ ენაზე.
გაიცემა სერტიფიკატები.

დამატებითი ინფორმაციისთვის დაგვიკავშირდით: salome.mumladze(at)dwv.ge

საქართველოს ინოვაციების და ტექნოლოგიების სააგენტომ 3000 IT სპეციალისტის უფასო გადამზადების პროგრამა დაიწყო!

პროგრამა განხორციელდება ეტაპობრივად და პირველ ეტაპზე 500 IT სპეციალისტი გადამზადდება. გადამზადებას მსოფლიოში უმსხვილესი IT ტრენინგ პროვაიდერი New Horizons უზრუნველყოფს​ შემდეგ პროფესიებში:

• Project Management
• Front-End Programming
• Back-End Programming
• Microsoft
• Cisco Career Certification
• Blockchain
• Cybersecurity
• Computer Aided Design & Engineering
• Artificial Intelligence
• Mobile Development
• Game Development
• UX/UI Design
• Data Science
• DevOps
• QA Engineer
• Freelancing & Product Management

სასწავლო პროცესი გაიმართება ონლაინ რეჟიმში ინგლისურ ენაზე და პროფესიული გადამზადების კურსის დასრულების შემდგომ თითოეულ მონაწილეს საშუალება ექნება, მიიღოს საერთაშორისო სერტიფიკატი.

დეტალური ინფორმაციისათვის ეწვიეთ ბმულს: https://ict.gov.ge/trainings/

პროგრამა Diaspora-Fachkräfte იწვევს და აფინანსებს გერმანიაში მოღვაწე 2 წლიანი სამუშაო გამოცდილების მქონე ქართველ სამედიცინო პერსონალს, საქართველოში სხვადასხვა კლინიკებში სამუშაოდ, სულ მცირე 3 კვირით, მაქსიმუმ 6 თვის ვადით.

დაფინანსდება სამგზავრო ხარჯები, ყოველდღიური ჰონორარი, მცირე აღჭურვილობა. განაცხადების განხილვა მოხდება დაჩქარებული ტემპებით.

დამატებითი კითხვების შემთხვევაში მიმარტეთ ქალბატონ ირმა წერეთელს ელ-ფოსტაზე: irma.tsereteli@giz.de

დაწვრილებითი ინფორმაცია იხილეთ ვებ გვერდზე: https://www.cimonline.de/de/html/diaspora-fachkrafte.html

საქართველოში აშშ-ს სახელმწიფო მდივნის მაიკ პომპეოს ვიზიტი 17-18 ნოემბერს იგეგმება.

საქართველოს საგარეო საქმეთა სამინისტროს ცნობით, ვიზიტის ფარგლებში სახელმწიფო მდივანი შეხვედრებს გამართავს საქართველოს პრემიერ-მინისტრთან, პრეზიდენტთან და საგარეო საქმეთა მინისტრთან, ასევე შეხვდება კათოლიკოს-პატრიარქს.

როგორ სამინისტრო აცხადებს, ვიზიტის ფარგლებში მხარეები განიხილავენ საქართველოსა და რეგიონში არსებულ უსაფრთხოების გარემოსა და ქვეყნებს შორის თანამშრომლობას რეგიონული და საერთაშორისო უსაფრთხოების განმტკიცების მიზნით, ასევე, საქართველოში მიმდინარე დემოკრატიულ და ეკონომიკურ რეფორმებს.

Sarke Information Agency, 12.11.2020

სააგენტო “აწარმოე საქართველოში”, გერმანიის ეკონომიკისა და ენერგეტიკის სამინისტროსთან თანამშრომლობით და GIZ-ის მხარდაჭერით გეგმავს მენეჯერთა გადამზადების პროგრამას, რომლის მიზანია საერთაშორისო ვაჭრობის შესაძლებლობების განვითარება მცირე და საშუალო ბიზნესისთვის, რაც განსაკუთრებულ მნიშვნელობას იძენს საქართველო ევროკავშირის ასოცირების შესახებ შეთანხმების კონტექსტში, რომელიც თავის მხრივ, მოიცავს შეთანხმებას ღრმა და ყოვლისმომცველი თავისუფალი სავაჭრო სივრცის შესახებ.

აღნიშნული უნიკალურ შანსს აძლევს ადგილობრივ მეწარმეებს წარმოებული პროდუქტი ყოველგვარი შეზღუდვების გარეშე გაიტანონ ევროკავშირის 500 მილიონიან ბაზარზე. მონაწილეებს საშუალება მიეცემათ დაამყარონ კონტაქტი გერმანულ კომპანიებთან და გამართონ შეხვედრები.

პროგრამის ძირითადი მიზნები:

• გერმანიის ბიზნეს მენეჯმენტის პრაქტიკის შესწავლა და გერმანული ბიზნეს კულტურის გაცნობა;
• საერთაშორისო ბიზნეს ურთიერთობებისა და მოლაპარაკების უნარების განვითარება;
• გერმანული ბიზნესი პრაქტიკის გაცნობა;
• თანამედროვე ტექნოლოგიებისა და დადანგარების შესახებ ცოდნის შეძენა;
• გერმანულ კომპანიებთან კავშირების დამყარება;
• პოტენციური ბიზნეს ურთიერთობების განვითარება.
• პროგრამა მოიცავს როგორც ტრეინინგებს, ასევე ვიზიტებს გერმანულ კომპანიებში და ინდივიდუალურ შეხვედრებს ადგილობრივი ბიზნესის წარმომადგენლებთან.

პროგრამაში მონაწილეობა (სამიზნე ჯგუფი):

პროგრამაში მონაწილეობა შეუძლიათ მიიღონ მცირე და საშუალო საწარმოების საშუალო ან მაღალი დონის მენეჯერებს, რომელთაც აქვთ მენეჯერულ პოზიციაზე მუშაობის მინიმუმ 2 წლიანი გამოცდილება, უმაღლესი განათლება ეკონომიკური, სავაჭრო, ტექნოლოგიური, მენეჯერული ან სხვა მსგავსი სპეციალობით და კარგად ფლობენ ინგლისურ ენას. ასევე კომპანია 2-3 წლის განმავლობაში წარმოდგენილი უნდა იყოს ადგილობრივ ან/და საერთაშორისო ბაზარზე, ქონდეს სურვილი ითანამშრომლოს გერმანულ კომპანიებთან კონკრეტული იდეებით.

გლობალური პანდემიის ვითარებიდან გამომდინარე პროგრამა ადაპტირდა ვირტუალური ფორმატზე და შედგება 3 ნაწილისგან:

• ვირტუალური პროგრამის ფაზა – მონაწილეებს საშუალება ექნებათ 8 კვირის განმავლობაში ონლაინ დაესწრონ სასწავლო კურსებს და სემნინარებს.
• (Follow-up Phase) – ვირტუალური პროგრამის დასრულების შემდეგ მონაწილეებს საშუალება ექნებათ მიღებული ცოდნა და გამოცდილება გამოიყენონ თავიანთ საქმიანობაში. 6 თვიანი პერიოდის განმავლობაში კონტაქტი ექნებათ გერმანულ ტრენინგ ცენტრთან.
• პროგრამის დასრულება გერმანიაში – ვირტუალური პროგრამის დასრულებიდან 6-12 თვის ვადაში მონაწილეებს მიიწვევენ 1 კვირით გერმანიაში, სადაც ჩაერთვებიან სემინარებში, შეხვდებიან გერმანელ მენეჯერებს და ბიზნეს ორგანიზაციების წარმომადგენლებს. ამასთანავე, საშუალება ექნებათ გამართონ ინდივიდუალური შეხვედრები და გააფორმონ ხელშეკრულებები გერმანელ ბიზნესპარტნიორებთან.

პროგრამაში მონაწილეობასთან დაკავშირებულ ხარჯს, გარდა ტრანსპორტირებისა (ფრენა და აეროპორტიდან გადაადგილება დანიშნულების ადგილზე) ფარავს გერმანული მხარე. პროგრამაში მონაწილეების რაოდენობა შეზღუდულია.

დამატებითი დეტალებისთვის და რეგისტრაციისთვის იხილეთ ბმული: http://www.enterprisegeorgia.gov.ge/ka/%E1%83%A1%E1%83%98%E1%83%90%E1%83%AE%E1%83%9A%E1%83%94%E1%83%94%E1%83%91%E1%83%98/fit-for-partnership?fbclid=IwAR0KWqxuAKYAZ9sQj_XK6Uhh83dMrLHqgiDRQPjkSi8LtE4mr2zL7Nr6I-c

საკოორდინაციო საბჭოს გადაწყვეტილებით, 9 ნოემბრიდან საქართველოს ყველა დიდ ქალაქში 22 საათიდან დილის 5 საათამდე გადაადგილება შეიზღუდება. შეზღუდვა მოქმედებს თბილისში, ბათუმში, ქუთაისში, რუსთავში, ზუგდიდში, გორსა და ფოთში. ეს ეხება როგორც ქვეითად, ისე ტრანსპორტითა და კერძო ავტომობილებით მოსიარულეებს.

მაია ცქიტიშვილის განცხადებით, შეზღუდვა არ გავრცელდება საერთაშორისო საავტომობილო გადაზიდვებზე და საოპერაციო შტაბთან შეთანხმებით, იმ პირებსა და საავტომობილო საშუალებებზე, რომლებიც სტრატეგიული ობიექტების ფუნქციონირებისთვის გადაადგილდებიან.

ყველა ორგანიზაცია იმუშავებს 22:00 საათამდე, გარდა სამედიცინო და ფარმაცევტული დანიშნულებისა, ასევე გარდა სტრატეგიული მნიშვნელობის ობიექტებისა.

გადაადგილების შეზღუდვის დარღვევისთვის იმოქმედებს ფულადი სანქცია 2000 ლარის ოდენობით.

თბილისში, ქუთაისში, ბათუმში, რუსთავში, ზუგდიდში, გორსა და ფოთში დროებით დაიხურება როგორც მუნიციპალური, ისე კერძო საბავშვო ბაღები. ასევე, ამ ქალაქებში მიღებული იქნება სპეციალური ზომები მუნიციპალურ ტრანსპორტში ადამიანების რაოდენობის შემცირებასთან დაკავშირებით. დღის განმავლობაში ტრანსპორტის გადაადგილება არ შეიზღუდება.

მთავრობის უწყებათშორისმა საბჭომ მიიღო გადაწყვეტილება, რომლის მიხედვითაც როგორც დახურულ, ისე ღია სივრცეებში პირბადის ტარება სავალდებულო ხდება.

ვიცე-პრემიერის, მაია ცქიტიშვილის განცხადებით, ვირუსის გავრცელების შესაჩერებლად გადაწყდა, რომ პირბადეების ტარება იქნება სავალდებულო არა მხოლოდ დახურულ, არამედ ღია სივრცეებშიც. დარღვევის შემთხვევაში სანქცია 20 ლარია.

მუნიციპალური ტრანსპორტის განვითარების პროგრამის ფარგლებში, რეგიონული ქალაქებისთვის გათვალისწინებულია 175 ერთეული ავტობუსის გადაცემა, იუწყება საქართველოს მთავრობა.

როგორც აღნიშნულია, მუნიციპალური განვითარების ფონდი, ევროპის რეკონსტრუქციისა და განვითარების ბანკის (EBRD) ფინანსური მხარდაჭერით ახორციელებს.

საერთო რაოდენობიდან 10-10 ავტობუსი განკუთვნილია თელავსა (აქამდე მუნიციპალური ტრანსპორტი არ გააჩნდა) და ფოთისთვის, 30 – გორისთვის, 25 – ზუგდიდისთვის, 40 – რუსთავისთვის, 60 – ქუთაისისთვის.

ავტობუსები მუნიციპალიტეტს მომდევნო წლის გაზაფხულამდე ეტაპობრივად გადაეცემა, იუწყება მთავრობა. თელავს 8.5-მეტრიანი, 5 ახალი ავტობუსი (50 მგზავრზე გათვლილი) 28 ოქტომბერს გადაეცა.

Sarke Information Agency, 31.10.2020

აზიის განვითარების ბანკი (ADB), ფისკალური მდგრადობის და სოციალური დაცვის პროგრამის ფარგლებში, საქართველოს 170.8 მილიონ EUR-ს გამოუყოფს, იუწყება საქართველოს ფინანსთა სამინისტრო.

როგორც აღნიშნულია, ეს ფინანსური რესურსი მიიმართება ბიუჯეტში. შესაბამის შეთანხმებას ხელი 29 ოქტომბერს მოეწერა.

ეს შეთანხმება ნაწილია იმ ფინანსური მხარდაჭერისა, რომელიც საქართველოს მთავრობამ პარტნიორი საერთაშორისო დონორი ორგანიზაციებისგან COVID-19-ის პანდემიასთან ბრძოლისა და ქვეყნის ეკონომიკის შემდგომი რეაბილიტაციისთვის მოიზიდა, მიუთითებს სამინისტრო.

უწყების ცნობით, დახმარების ფარგლებში რეფორმები ფოკუსირებული იქნება 3 ძირითად მიმართულებაზე: COVID-19-ით გამოწველი კრიზისის შედეგად გაზრდილი ფისკალური რისკების მართვის გაძლიერება, სახელმწიფო ფასიანი ქაღალდების შიდა ბაზრის განვითარება, სოციალური დაცვის პროგრამებისა და ფისკალური მდგრადობის განმტკიცება.

Sarke Information Agency, 02.11.2020