Wirtschaft

საქართველოს პერსპექტივები ელექტროენერგიით ვაჭრობის მიმართულებით იმედისმომცემად გამოიყურება. ქვეყანას უკვე აქვს განახლებადი ენერგიის წარმოების ყველაზე მაღალი წილი კავკასიაში. მომდევნო წლების პროგნოზის მიხედვით, საქართველოში ელექტროენერგიის მოხმარება 2035 წლამდე წლიური 3.4%-იანი ზრდის ტემპით 20.0 ტერავატსაათს მიაღწევს. ამჟამად საქართველოში ელექტროენერგიის მოხმარება 14.9 ტერავატსაათს შეადგენს.

ელექტროენერგიაზე მოთხოვნის ზრდას ძირითადად ეკონომიკური აქტივობის ზრდა და ელექტრიფიკაცია განაპირობებს. თუმცა, ენერგიის წარმოების გაფართოებისთვის საჭიროა 5.5 მილიარდი აშშ დოლარის ინვესტიცია როგორც ელექტროენერგიის წარმოების ობიექტებში, ისე ქსელის განვითარებაში.

ენერგიის წარმოების ძლიერი ზრდის მისაღწევად აუცილებელია განახლებადი ენერგიების განვითარებაც. ბოლო 20 წლის განმავლობაში განახლებადი ენერგიის წარმოების ობიექტების 94% სახელმწიფო მხარდაჭერის დახმარებით აშენდა.

სახელმწიფოს შემდგომი მხარდაჭერის პირობებში, საქართველო შეიძლება ელექტროენერგიის წმინდა ექსპორტიორი გახდეს. თურქეთთან ერთად, რომელიც ტრადიციულად ქვეყნის ყველაზე ძლიერი საექსპორტო ბაზარია, ევროპაც გახდება ელექტროენერგიით ვაჭრობის პარტნიორი დაგეგმილი შავი ზღვის წყალქვეშა კაბელის მეშვეობით.

2 ივლისიდან ავიაკომპანია Eurowings აფართოებს თავის მარშრუტების ქსელს და  თბილისსა და კიოლნს შორის  პირდაპირ ავიარეისს ამატებს. რეისი შესრულდება კვირაში ორჯერ – ყოველ სამშაბათსა და ხუთშაბათს. ფრენები შესრულდება Airbus A320 ტიპის თვითმფრინავით.
თბილისის საერთაშორისო აეროპორტისთვის კიოლნი წარმოადგენს ახალ მიმართულებას. მარშრუტის დამატება მნიშვნელოვანი ნაბიჯია საქართველოს საერთაშორისო კავშირების გაძლიერებისა და გერმანიასთან ეკონომიკური ურთიერთობების გაღრმავების მიმართულებით.
ფასობრივი თვალსაზრისით, ახალი რეისი კონკურენტულ სეგმენტში პოზიციონირდება. არსებული მონაცემებით, ივლისში ერთმხრივი ბილეთის ღირებულება დაახლოებით 120 ევროდან 160 ევრომდე მერყეობს. აღნიშნული პირობები მიმზიდველს ხდის მიმართულებას როგორც ბიზნეს-მოგზაურებისთვის, ასევე ტურისტებისთვის.

2025 წლის პირველი ცხრა თვის განმავლობაში საქართველოს ავიაციის სფერომ საგრძნობი ზრდა დააფიქსირა. სამოქალაქო ავიაციის სააგენტოს მონაცემებით, შესრულდა 28 681 რეისი, რაც 18 პროცენტით მეტია, ვიდრე გასულ წელს. საერთო ჯამში, საქართველოს აეროპორტებით ისარგებლა 6,49 მილიონმა მგზავრმა, რაც გასულ წელთან შედარებით 14-პროცენტიან ზრდას შეადგენს.

ყველაზე მეტ მგზავრს თბილისის საერთაშორისო აეროპორტი მოემსახურა – (4 მილიონზე მეტი ადამიანი (+12 %)), შემდეგ მოდის ქუთაისის აეროპორტი 1,4 მილიონი მგზავრით (+10 %), ხოლო ბათუმის აეროპორტმა მიიღო თითქმის 1 მილიონი მგზავრი, რაც 32 პროცენტით მეტია, ვიდრე გასული წლის შესაბამის პერიოდში.

2024 წლის მსგავსად, თურქეთი  წელსაც რჩება საქართველოს მოქალაქეებისთვის ყველაზე პოპულარულ მიმართულებად, თუმცა ევროპული მიმართულებების წილი საგრძნობლად იზრდება. საქსტატის მონაცემებით, საერთაშორისო ფრენების დაახლოებით 13–14 პროცენტი მოდის ევროკავშირის ქვეყნებზე.

ყველაზე მოთხოვნად ევროპულ მიმართულებებს შორის არის გერმანია, პოლონეთი, იტალია, საბერძნეთი და ესპანეთი – მარშრუტები, რომლებსაც ძირითადად Wizz Air ასრულებს. კომპანია ინარჩუნებს ლიდერობას საქართველოს ბაზარზე 17-პროცენტიანი წილით.

წყარო: Georgian Civil Aviation Agency (2025); Commersant.ge; Geostat.ge; Georgia Today; Factcheck.ge.

სააგენტო “აწარმოე საქართველოში”, გერმანიის ეკონომიკისა და ენერგეტიკის სამინისტროსთან თანამშრომლობით და GIZ-ის მხარდაჭერით, გეგმავს მენეჯერთა გადამზადების პროგრამას, რომლის მიზანია, საერთაშორისო ვაჭრობის შესაძლებლობების განვითარება მცირე და საშუალო ბიზნესისთვის.
აღნიშნული პროგრამა უნიკალურ შანსს აძლევს ადგილობრივ მეწარმეებს დაამყარონ კონტაქტი გერმანულ კომპანიებთან და გამართონ ბიზნეს შეხვედრები.

პროგრამა მოიცავს როგორც ტრენინგებს, ასევე ვიზიტებს გერმანულ კომპანიებში და ინდივიდუალურ შეხვედრებს ადგილობრივი ბიზნესის წარმომადგენლებთან.

პროგრამის ძირითადი მიზნები:
• გერმანიის ბიზნეს მენეჯმენტის პრაქტიკისა და გერმანული ბიზნეს კულტურის გაცნობა;
• გერმანიაში უახლესი მწვანე ტექნოლოგიების, წარმოების სისტემებისა და სერვისების გაცნობა;
• გრძელვადიანი ბიზნეს პარტნიორობის ფორმირება გერმანულ კომპანიებთან;
• საერთაშორისო ბიზნეს ურთიერთობებისა და მოლაპარაკების უნარების განვითარება;
• თანამედროვე ტექნოლოგიებისა და დადანგარების შესახებ ინფორმაციის მიღება;

აპლიკანტი უნდა აკმაყოფილებდეს შემდეგ კრიტერიუმებს:

• უმაღლესი განათლება, ეკონომიკური, სავაჭრო, ტექნოლოგიური, მენეჯერული ან სხვა მსგავსი სპეციალობით;
• ინგლისური ენის B2 დონეზე ფლობა;
პროგრამა მონაწილეებს სთავაზობს:

• მონაწილეებს საშუალება ექნებათ 8 კვირის განმავლობაში ონლაინ დაესწრონ სასწავლო კურსებს და სემინარებს;
• ვირტუალური პროგრამის დასრულების შემდეგ მონაწილეებს მიიწვევენ 3 კვირით გერმანიაში, სადაც ისინი ჩაერთვებიან სემინარებში, შეხვდებიან გერმანელ მენეჯერებს და ბიზნეს ორგანიზაციების წარმომადგენლებს. ამასთან, საშუალება ექნებათ გამართონ ინდივიდუალური შეხვედრები და გააფორმონ ხელშეკრულებები გერმანელ ბიზნესპარტნიორებთან;
• წარმატებული გერმანული კომპანიების გამოცდილების გაცნობა;
• პოტენციურ ბიზნეს პარტნიორებთან პირდაპირი კონტაქტი.

პროგრამის ეტაპები:

• I ფაზა – მონაწილეებს საშუალება ექნებათ 8 კვირის განმავლობაში ონლაინ დაესწრონ სასწავლო კურსებს და სემინარებს;
• II ფაზა – ვირტუალური პროგრამის დასრულების შემდეგ მონაწილეებს საშუალება ექნებათ მიღებული ცოდნა და გამოცდილება გამოიყენონ თავიანთ საქმიანობაში. 6 თვის განმავლობაში კონტაქტი ექნებათ გერმანულ ტრენინგ ცენტრთან;
• III ფაზა – ვირტუალური პროგრამის დასრულებიდან 6-12 თვის ვადაში მონაწილეებს მიიწვევენ 3 კვირით გერმანიაში, სადაც ისინი ჩაერთვებიან სემინარებში, შეხვდებიან გერმანელ მენეჯერებს და ბიზნეს ორგანიზაციების წარმომადგენლებს. ამასთან, საშუალება ექნებათ გამართონ ინდივიდუალური შეხვედრები და გააფორმონ ხელშეკრულებები გერმანელ ბიზნესპარტნიორებთან.
შერჩევის პროცესი:

• დაინტერესებული პირი ავსებს სააპლიკაციო დოკუმენტებს და აგზავნის სააგენტოში ელექტრონული ფორმით;
• მიღებული აპლიკაციები გადაირჩევა GIZ-ის და სააგენტო „აწარმოე საქართველოში“ გუნდის მიერ;
• შერჩეულ აპლიკანტებთან შესაძლოა ჩატარდეს გაცნობითი ონლაინ შეხვედრა;

• შერჩეულ აპლიკანტებთან შესაძლოა ჩატარდეს გაცნობითი ონლაინ შეხვედრა;

• საბოლოოდ შერჩეულ კანდიდატებს დაუკავშირდებიან და აცნობებენ პროგრამაში მონაწილეობის შესახებ;

პროგრამის საინფორმაციო ბროშურის და სააპლიკაციო დოკუმენტების სანახავად, ეწვიეთ ამ ბმულს.

გთხოვთ, შევსებული სააპლიკაციო დოკუმენტები და პასპორტის ასლი გააგზავნოთ, არაუგვიანეს  2025 წლის 14 ნოემბრისა შემდეგ ელ.ფოსტაზე: applypwg@gmail.com (თემა:Partnering in Business with Germany – სახელი და გვარი).

GIZ-ის მიერ დაფარული ხარჯები გერმანიაში:

• გერმანული კომპანიების ჯგუფური ვიზიტები და სხვა აქტივობები;
• 19 ღამე სამვარსკვლავიან სასტუმროში;
• ტრანსფერი მატარებლიდან/ავტოსადგურიდან/აეროპორტამდე მთელი ჯგუფის ცენტრალიზებული ჩამოსვლის/გამგზავრების შემთხვევაში;
• მონაწილის მგზავრობის ხარჯები, რომლებიც დაკავშირებულია ინდივიდუალურ საქმიან შეხვედრებთან (ავტობუსით ან მატარებლით გერმანიის ფარგლებში)
• ჯანმრთელობის დაზღვევა გერმანიაში ყოფნის დროს.

დამატებითი ინფორმაციისთვის, გთხოვთ, დაუკავშირდეთ სააგენტოს მომსახურების ცენტრს, ნომერზე: 1525.

პროგრამის შესახებ დეტალური ინფორმაცია შეგიძლიათ იხილოთ ვებგვერდზე.

ბოლო წლებში საქართველოდან თხილის ექსპორტს სტაბილურად მზარდი ტენდენცია ახასიათებს. საქსტატის მონაცემებზე დაყრდნობით, 2025 წლის იანვარ-აგვისტოში საქართველოდან ექსპორტზე 7 883,8 ტონა თხილი გავიდა, რომლის საერთო ღირებულებამ 59 042,9 ათასი აშშ დოლარი შეადგინა. ეს მაჩვენებელი 30 %-ით აღემატება 2024 წლის ანალოგიურ პერიოდს, როდესაც ექსპორტმა 6 062,8 ტონა შეადგინა.

მიუხედავად იმისა, რომ იტალია კვლავ რჩება საქართველოს თხილის მთავარ საექსპორტო ბაზრად (1 179,3 ტონა), ბოლო პერიოდში გერმანიის როლი თვალშისაცემად იზრდება. მიმდინარე წლის პირველ რვა თვეში გერმანიაში ექსპორტირებული თხილის მოცულობამ 382,9 ტონა შეადგინა, რაც ქვეყანას ევროპის ერთ-ერთ მნიშვნელოვან ბაზრად აქცევს.

გერმანია ცნობილია თხილის მოხმარების მაღალი კულტურით -პროდუქტი ფართოდ გამოიყენება საკონდიტრო, შოკოლადის და საკულინარიო ინდუსტრიაში. ბოლო წლებში კი გერმანიაში განსაკუთრებით გაიზარდა მოთხოვნა ნატურალური და ორგანული პროდუქტების მიმართ. ამ ტენდენციის ფონზე, საქართველოში მოყვანილი მაღალი ხარისხის თხილი, რომელიც აკმაყოფილებს საერთაშორისო სტანდარტებს, განსაკუთრებული ინტერესის საგნად იქცა გერმანელ იმპორტიორებში.

გერმანია საქართველოსთვის არა მხოლოდ სტაბილური, არამედ მზარდი და სტრატეგიული ბაზარია. ხარისხის სტანდარტების გაუმჯობესებისა და ეფექტური ლოგისტიკური გადაწყვეტილებების დანერგვის შემთხვევაში მოსალოდნელია, რომ უახლოეს წლებში ქართულ თხილზე გერმანიაში მოთხოვნა კიდევ უფრო გაიზრდება და ქვეყანა იტალიასთან და ესპანეთთან ერთად ერთ-ერთ მთავარ იმპორტიორ პარტნიორად ჩამოყალიბდება.

გარდა იტალიისა და გერმანიისა, საქართველოს თხილის საექსპორტო სტრუქტურაში მნიშვნელოვან ადგილს იკავებენ ასევე ესპანეთი (1 171,2 ტონა), საფრანგეთი (540,3 ტონა) და რუსეთი (413,4 ტონა). ამდენად, 2025 წლის პირველ რვა თვეში TOP 5 საექსპორტო ბაზარია: იტალია, ესპანეთი, საფრანგეთი, რუსეთი და გერმანია.

ეს მონაცემები კიდევ ერთხელ უსვამს ხაზს საქართველოს თხილის სექტორის გაძლიერებულ პოზიციებს ევროპულ ბაზრებზე და წარმოაჩენს ქვეყნის მზარდ პოტენციალს აგროექსპორტის მიმართულებით.

ბოლო წლების განმავლობაში, საქართველოს სატრანსპორტო და დასაწყობების სექტორი სტაბილური ზრდით გამოირჩევა. მხოლოდ გასულ წელს, სექტორი 9%-ით გაიზარდა და მისმა წილმა ქვეყნის მშპ-ში 5,9%-ს მიაღწია.

ზრდის ტენდენცია განსაკუთრებით ტვირთბრუნვაშია თვალსაჩინო, რაც მნიშვნელოვნად ზრდის მოთხოვნას როგორც დასაწყობების მომსახურებებზე, ასევე თანამედროვე სასაწყობო სივრცეებზე. ეს პროცესი განსაკუთრებით გამოკვეთილი ბოლო წლებში გახდა: 2023-დან 2024 წლამდე ახალაშენებული სასაწყობო ფართობი 3,4-ჯერ გაიზარდა.

ამჟამად, საქართველოში საწყობების ჯამური ფართობი დაახლოებით 2,2 მილიონ კვადრატულ მეტრს შეადგენს. ამ ფართობის ორი მესამედი მფლობელების მიერ გამოიყენება, ხოლო დანარჩენი ნაწილი იჯარით არის გაცემული. იჯარით გაცემული ფართობებიდან 68% თბილისშია თავმოყრილი, 17% – ქუთაისში, ხოლო დანარჩენი შავი ზღვის პორტებზე ნაწილდება (ბათუმი – 5%, ფოთი – 5%).

თიბისი კაპიტალის პროგნოზით, მომდევნო სამ წელიწადში სასაწყობო ფართობების მოცულობა კიდევ დაახლოებით 9%-ით გაიზრდება.

აღნიშნული ტენდენცია ნათლად აჩვენებს, რომ საქართველო სულ უფრო მნიშვნელოვან როლს იძენს ევროპასა და ცენტრალური აზიის დინამიურად მზარდ ბაზრებს შორის.

კასპში დასრულდა მზის ელექტრო სადგურის მშენებლობა, რომლის დადგმული სიმძლავრე 2.3 მეგავატია. ეს სადგური წარმოადგენს პირველ ინდუსტრიულ მზის სადგურს საქართველოში, რომელიც უკვე ექსპლუატაციაში შევიდა.

პროექტის ინვესტიცია შეადგენს 1 მილიონ აშშ დოლარს, ხოლო სადგურის წლიური გამომუშავება სავარაუდოდ 3.3 მლნ კვტ/სთ-ს მიაღწევს. აღნიშნული ინვესტიცია ხელს შეუწყობს ქვეყნის ენერგოუსაფრთხოებას და ეკონომიკურ განვითარებას.

გარდა ამისა, Green Energy-მ უკვე დაიწყო ახალი მზის ელექტროსადგურის მშენებლობა გორში, რომლის სიმძლავრე ასევე 2.3 მეგავატია. აღნიშნული პროექტების განხორციელება ხელს შეუწყობს სუფთა და განახლებადი ენერგიის წყაროების ათვისებას საქართველოში, რაც მნიშვნელოვანია ქვეყნის ენერგეტიკული მომავლისთვის.

შუა დერეფანში 2013 წლიდან დღემდე, ჩინეთიდან ევროპაში 20.000 საკონტეინერო მატარებელმა გაიარა – იუწყება Trend.

ეს სატრანზიტო დერეფანი 10 000-დან 20 000-მდე მატარებელმა 3 წელიწადში გაიარა. 2013 წლიდან 2022 წლამდე შუა დერეფანს 10. 000-მა სატვირთო მატარებელი ჰყავდა გატარებული. ამჟამად ექსპრეს ხაზზე 73 მარშრუტი ფუნქციონირებს, რომელიც 70 ლოგისტიკურ კვანძს 10-ზე მეტ ქვეყანაში აერთიანებს, მათ შორის გერმანიასა და პოლონეთში. ეს მარშრუტი მოიცავს 60 ქალაქსა და ჩინეთის 24 პროვინციას.

შუა დერეფანი წარმოადგენს სატრანსპორტო-სავაჭრო მარშრუტს, რომელიც აზიასა და ევროპას რეგიონის რამდენიმე ქვეყნის გავლით აკავშირებს. ის ტრადიციული ჩრდილოეთისა და სამხრეთის დერეფნების ალტერნატივაა. შუა დერეფანი ჩინეთიდან იწყება და ცენტრალური აზიის – ყაზახეთის, უზბეკეთისა და თურქმენეთის გავლით, კასპიის ზღვით აზერბაიჯანს, საქართველოსა და თურქეთს უკავშირდება, საბოლოო დანიშნულების ადგილი კი ევროპაა.

2025 წლის პირველ ნახევარში  საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 11 933.4 მლნ. აშშ დოლარი შეადგინა, რაც წინა წლის შესაბამისი პერიოდის მაჩვენებელზე 12.7 პროცენტით მეტია. აქედან, ექსპორტი 3 234.2 მლნ. აშშ დოლარი იყო (გაიზარდა 13.7 პროცენტით), ხოლო იმპორტი 8 699.3 მლნ. აშშ დოლარი (გაიზარდა 12.4 პროცენტით).

უარყოფითმა სავაჭრო ბალანსმა 2025 წლის იანვარ-ივნისში 5 465.1 მლნ. აშშ დოლარი შეადგინა, რაც საგარეო სავაჭრო ბრუნვის 45.8 პროცენტია.

საქართველოს  აეროპორტების გაერთიანების თანახმად, საქართველოს აეროპორტებში 2025 წლის პირველ ნახევარში მგზავრთნაკადისა და რეისების კუთხით, ისტორიული მაქსიმუმი დაფიქსირდა.

იანვარ-ივნისის პერიოდში ქვეყნის საერთაშორისო აეროპორტებში ჯამური მგზავრთნაკადიც და რეისების რაოდენობა 14-14%-ით გაიზარდა. საქართველოს საერთაშორისო აეროპორტები 2025 წლის პირველ ნახევარში 3 654 063 მგზავრსა და 17 ათასამდე რეისს მოემსახურნენ, რაც რეკორდული მაჩვენებელია.

თბილისის შოთა რუსთაველის სახელობის საერთაშორისო აეროპორტი პირველ 6 თვეში ისტორიულად ყველაზე მეტ, 2 358 937 მგზავრს მოემსახურა და გასული წლის ანალოგიურ პერიოდთან შედარებით 11%-ით მეტი შეადგინა.

რეკორდული იყო 2025 წლის პირველი ნახევარი ქუთაისის საერთაშორისო აეროპორტისთვისაც. იანვარ-ივნისში დავით აღმაშენებლის სახელობის აეროპორტი 833 512 მგზავრს მოემსახურა, რაც 12%-ით მეტია გასული წლის ანალოგიურ პერიოდში გადაყვანილი მგზავრების რაოდენობასთან შედარებით.

ბათუმის საერთაშორისო აეროპორტს, 2025 წლის იანვარ-ივნისში ალექსანდრე ქართველის სახელობის აეროპორტი 450 330 მგზავრსა და 2 121 რეისს მოემსახურა.

2025 წლის იანვარ-მაისში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 9 790.9 მლნ. აშშ დოლარი შეადგინა, რაც წინა წლის შესაბამისი პერიოდის მაჩვენებელზე 13.3 პროცენტით მეტია. აქედან, ექსპორტი 2 595.3 მლნ. აშშ დოლარი იყო (გაიზარდა 14.6 პროცენტით), ხოლო იმპორტი 7 195.6 მლნ. აშშ დოლარი (გაიზარდა 12.8 პროცენტით).
„საქსტატის“ ინფორმაციით, უარყოფითმა სავაჭრო ბალანსმა 2025 წლის იანვარ-მაისში 4 600.3 მლნ. აშშ დოლარი შეადგინა, რაც საგარეო სავაჭრო ბრუნვის 47.0 პროცენტია.

სააგენტო “აწარმოე საქართველოში”, გერმანიის ეკონომიკისა და ენერგეტიკის სამინისტროსთან თანამშრომლობით და GIZ-ის მხარდაჭერით, ისევ ახორციელებს მენეჯერთა გადამზადების პროგრამას,

თუ თქვენი კომპანია მოღვაწეობს სასოფლო-სამეურნეო ან სასურსათო სექტორში, შესაძლებლობა გეძლევათ, მონაწილეობა მიიღოთ პროგრამაში „Partnering in Business with Germany“, რომლის მიზანია, ქართულ და გერმანულ კომპანიებს შორის საერთაშორისო თანამშრომლობის შესაძლებლობების შექმნა. პროგრამა განკუთვნილია ქართველი მენეჯერებისთვის, რომლებსაც გააჩნიათ მოლაპარაკების წარმოების უფლება და კარგად ფლობენ ინგლისურ ენას.

პროგრამა სთავაზობს მონაწილეებს:

• გერმანიის სასოფლო-სამეურნეო და სასურსათო სექტორის თანამედროვე ტენდენციების გაცნობას
• ინოვაციური ტექნოლოგიების (Smart Farming, ბიოწარმოება, ციფრული გადაწყვეტილებები, ენერგოეფექტიანობა) შესწავლას
• პირდაპირი კონტაქტის დამყარებას გერმანელ პარტნიორებთან
• მონაწილეობას საერთაშორისო გამოფენაში ANUGA 2025 ქ. კიოლნში
• წვდომას საერთაშორისო ბიზნეს-ქსელთან, რომელიც აერთიანებს პროგრამის 18 ქვეყნის 18,500-ზე მეტ კურსდამთავრებულს
• პირდაპირი კონტაქტს პოტენციურ პარტნიორებთან
• ქართული კომპანიების შესვლას გერმანულ ბაზარზე

გერმანიაში პროგრამის ფარგლებში სრულად იფარება:

• ჯგუფური ვიზიტები გერმანულ კომპანიებში და პროგრამული აქტივობები
• 19 ღამის განთავსება 3-ვარსკვლავიან სასტუმროში (ან მის ეკვივალენტურ საცხოვრებელში) ნახევარ დაფინასებით
• ტრანსფერი სადგურიდან/აეროპორტიდან ჯგუფის ცენტრალიზებული გადაადგილების შემთხვევაში
• ინდივიდუალური საქმიანი შეხვედრებით გამოწვეული მგზავრობის ხარჯები (გერმანიაში, ავტობუსით ან მატარებლით)
• სამედიცინო დაზღვევა გერმანიაში ყოფნისას

დამატებითი ინფორმაცია პროგრამის შესახებ ხელმისაწვდომია აქ.

პროექტი ჩატარდება  2025 წლის 29.09-16.10-ს  გერმანიაში.
რეგისტრაციის ბოლო ვადაა – 2025 წლის 20 ივნისი.

საპროგრამო სააპლიკაციო ფორმის ჩამოსატვირთად დააჭირეთ ამ ბმულს.  შევსებული სარეგისტრაციო ფორმა გააგზავნეთ პასპორტის ასლთან ერთად შემდეგ ელ. ფოსტაზე: applypwg@gmail.com 

2025 წლის აპრილში ექსპორტი, წინა წლის აპრილთან შედარებით, 41.1%-ით გაიზარდა და 616.8 მლნ აშშ დოლარი შეადგინა, რაც აპრილის თვის რეკორდული მოცულობაა.

ჯამურად, იანვარ-აპრილში, ექსპორტი 14.2%-ით გაიზარდა და ასევე რეკორდულ ოდენობას, 2.014 მლრდ აშშ დოლარს გაუტოლდა.

2025 წლის იანვარ-აპრილში იმპორტი 15.7%-ით გაიზარდა და 5.741 მლრდ აშშ დოლარით განისაზღვრა.

2025 წლის აპრილში სავაჭრო ბრუნვა 2.016 მლრდ აშშ დოლარი იყო, რაც წინა წლის შესაბამისი პერიოდის მაჩვენებელს 5.7%-ით აღემატება. 2025 წლის იანვარ-აპრილში სავაჭრო ბრუნვა 15.3%-ით, 7.756 მლრდ აშშ დოლარამდე გაიზარდა, რაც ექსპორტის მსგავსად, ასევე რეკორდული მოცულობაა.

2024 წელს, საქართველოს ტრანსპორტისა და ლოგისტიკის სექტორის წარმოებამ 9.7 მლრდ ლარს მიაღწია, რაც, წინა წელთან შედარებით, 14%-ით მეტია – 8.51 მლრდ ლარი. ამის შესახებ „თიბისი კაპიტალის“ კვლევაში ვკითხულობთ.

ანალიზში ასევე აღნიშნულია, რომ ტრანსპორტისა და ლოგისტიკის სექტორის 9.7 მლრდ-იანი წილი, საქართველოს მთლიანი ეკონომიკური წარმოების დაახლოებით 6.6%-ია.

„2024 წელს, საქართველოში, საქართველოდან და საქართველოს გავლით 31 მლნ ტონა ტვირთი გადაიტანეს, რაც, გასულ წელთან შედარებით, 5%-იანი ზრდაა. იმპორტირებული ტვირთების რაოდენობა 8%-ით გაიზარდა, ექსპორტი – 10%-ით, ხოლო სატრანზიტო ტვირთები – 3%-ით. ტრანზიტი კვლავ დომინირებდა და მთლიანი ტვირთების გადაზიდვის 55%-ს შეადგენდა, შემდეგ 37%-იანი წილით იმპორტი მოდის, ექსპორტს კი 8%-იანი წილი აქვს.

ქართველოს პორტებისა და ტერმინალების მიერ გადამუშავებული ტვირთების მთლიანმა მოცულობამ 15.6 მლნ ტონა შეადგინა, რაც წლიური 6%-იანი მატებაა.

სარკინიგზო ტვირთების მოცულობა წლიურად 1%-ით გაიზარდა და 13.7 მლნ ტონას მიაღწია.

საგზაო ტვირთების გადაზიდვის სრული ოდენობა 14.8 მლნ ტონა იყო, რაც ახალი რეკორდია – გასულ წელს 4%-ით ნაკლები (14.23 მლნ ტონა) იყო.

რაც შეეხება საჰაერო ტვირთებს, მისი სრული მოცულობა 26.2 ათასი ტონა გახლდათ და ეს წლიური 34%-იანი ზრდაა“, – აღნიშნულია „თიბისი კაპიტალის“ კვლევაში.

საქართველოს ინოვაციების და ტექნოლოგიების სააგენტო აცხადებს საგრანტო კონკურსს აქსელერატორებისთვის ,,ინოვაციური სტარტაპების აქსელერაციის პროგრამის” განსახორციელებლად.

განაცხადების მიღების ბოლო ვადაა – 20 ივნისი, 2025, 23:59 (GMT+4) შემდეგ ელ. ფოსტაზე accelerator@gita.gov.ge

პროგრამაში მონაწილეობის მისაღებად აქსელერატორებმა უნდა დააკმაყოფილონ შემდეგი საკვალიფიკაციო მოთხოვნები:

• არის იურიდიული პირი ან იურიდიულ პირთა გაერთიანება;
• გააჩნია აქსელერაციის პროგრამის მართვის არანაკლებ 8-წლიანი გამოცდილება;
• აქსელერატორის მმართველ დირექტორს გააჩნია 15-წლიანი გამოცდილება კომბინირებული სამეწარმეო და აღმასრულებელი დონის ბიზნესისა და ანგელოზი ინვესტორის/ვენჩურული კაპიტალის მიმართულებით;
• აქსელერაციის პროცესში ჩართული ჰყავს სულ მცირე 10 მენტორი, არანაკლებ 10-წლიანი მენტორობის გამოცდილებით.

განმცხადებლები, რომლებიც აკმაყოფილებენ ზემოაღნიშნულ მოთხოვნებს, მიწვეულნი იქნებიან ფიზიკურ გასაუბრებაზე შესარჩევი კომისიის წინაშე 2025 წლის 21-25 ივლისის პერიოდში ქ. თბილისში, საქართველოში.

შერჩეული აქსელერატორები მიიღებენ გრანტს ,,ინოვაციური სტარტაპების აქსელერაციის პროგრამის” განსახორციელებლად. საგრანტო ხელშეკრულების ხანგრძლივობა იქნება ოთხი წელი, რომელიც განახლდება ყოველწლიურად.

პროგრამის განხორციელება უნდა დაიწყოს არაუგვიანეს 2026 წლის იანვრისა.

პროგრამის მიზანია საქართველოს სტარტაპ ეკოსისტემის გაძლიერება, ინოვაციური და ტექნოლოგიური ბიზნეს იდეების მქონე სტარტაპების საინვესტიციო პოტენციალის გაძლიერება და გლობალურ ბაზარზე გასვლის ხელშეწყობა.

ლითონის გადამამუშავებელი და სამთო სექტორი საქართველოში დიდი გამოწვევების წინაშე დგას. ფეროშენადნობები განიცდიან ფასების მკვეთრ რყევებს მსოფლიო ბაზარზე. საექსპორტო ფასი დაეცა 2.000 აშშ დოლარიდან ტონაზე (2021) 1.140 აშშ დოლარამდე (2024 წ.), რის საფუძველზეც შემცირდა შემოსავალი 460 მილიონი აშშ დოლარიდან 322 მილიონ აშშ დოლარამდე ექსპორტის მოცულობის გაზრდის მიუხედავად. განსაკუთრებით დაზარალდა აშშ-ს ბაზარი, სადაც ქართული ექსპორტის 75% ფეროშენადნობებისგან შედგება.  ექსპორტი შემცირდა ევროკავშირშიც და მიაღწია 10-წლიან მინიმუმს ( მთლიანი ექსპორტის 15,8%).

კრიზისია ჭიათურაშიც მანგანუმის მოპოვებისას. მანგანუმის ფასების დაცემამ და მაღალი ხელფასების გამო სამთო ხარჯების ზრდამ აიძულა ჯორჯიან მანგანეზი შეწყვიტოს წარმოება 2024 წელს. მიუხედავად იმისა, რომ უკვე აღებულია 82.6 მილიონი ლარის სესხები, ბანკები უარს ამბობენ შემდგომ დაფინანსებაზე.

გერმანული აუდიტორული კომპანიის DMT-ის მიერ 2024 წელს გამოქვეყნებული ანალიზის შედეგად დადგინდა, რომ ჭიათურაში მიწისქვეშა მადნის მოპოვება ეკონომიკურად არამომგებიანია მადნის დაბალი ხარისხისა და არაეფექტური გადამუშავების გამო.

თხილის ექსპორტი მნიშვნელოვან ზრდას განიცდის. 2024 წლის 1 აგვისტოდან 2025 წლის 3 მარტის ჩათვლით, ექსპორტირებულია 13,700 ტონა თხილი – რაც გასულ წელთან შედარებით 18%-ით მეტია. ექსპორტიდან მიღებული შემოსავლები გაზრდილია 36%-ით, რაც საერთო ჯამში 84.4 მილიონ აშშ დოლარს შეადგენს. ასევე, საშუალო საექსპორტო ფასი კილოგრამზე 16%-ით გაიზარდა და ამჟამად 6.14 აშშ დოლარს შეადგენს.
საქართველოს თხილის ძირითადი იმპორტიორები ევროპული ქვეყნები არიან, მათ შორის იტალია, ესპანეთი, გერმანია, საფრანგეთი, პოლონეთი და ჩეხეთი. ასევე, სხვა ბაზრები მოიცავს სომხეთს, ჩინეთს, თურქეთს, ისრაელს, რუსეთს და უკრაინას.

2025 წელს ნუშისა და კაკლის მწარმოებელთა ასოციაციის წევრმა 8 კომპანიამ, თიბისის მხარდაჭერით, ინდოეთის ქალაქ მუმბაიში, საერთაშორისო გამოფენაში – MEWA INDIA 2025 მიიღო მონაწილეობა. ვიზიტის ფარგლებში, ნუშისა და კაკლის მწარმოებელთა ასოციაციამ კავშირები დაამყარა ინდოეთის ბაზარზე პოტენციურ შემსყიდველებთან და თანამშრომლობის მემორანდუმი გააფორმა გამოფენის ორგანიზატორ ორგანიზაციასთან – ინდოეთის მშრალი ხილისა და კაკლოვნების საბჭოსთან.

ინდოეთი ერთ-ერთი ყველაზე დიდი ბაზარია თხილისთვის, და ქართული მწარმოებლები ელოდებიან, რომ მომდევნო წლებში ამ მიმართულებით მათი საექსპორტო შესაძლებლობები მნიშვნელოვნად გაიზრდება. ამჟამად საქართველოს თხილის მთავარი საექსპორტო ბაზრები ევროპის, დასავლეთ და სამხრეთ აზიის ქვეყნებია.

Die Nationale Weinagentur Georgiens erhöht 2025 ihr Budget für die internationale Weinwerbung auf 6,15 Millionen USD. Das Programm unterstützt Exporteure in wichtigen Märkten wie den USA, dem Vereinigten Königreich, Deutschland und Polen. Es werden nicht nur Weinausstellungen und Festivals im Inland gefördert, sondern ebenso im Ausland. Georgischer Wein wurde im Jahr 2024 auf 137 internationalen Events in 20 Ländern präsentiert, was zur Steigerung der globalen Anerkennung beigetragen hat. Die USA, zahlreiche Mitgliedstaaten der EU, Japan und Südkorea sind Teil der Länder, an denen Campangen stattgefunden haben. Beispielsweise wurde in Deutschland auf Messen wie der Eurovino oder Prowein georgischer Wein ausgestellt. 

Merklich ist dies daran, dass im  Jahr 2024 die Exporte von georgischem Wein und Spirituosen um 24% gestiegen sind. Nun umfasst dieser Export einen Gesamtwert von 565 Millionen USD. Besonders starke Wachstumsraten wurden in den USA, der EU sowie der Türkei und den VAE registriert.

გერმანიის ეკონომიკური გაერთიანების (DWV) წევრი, გრანთ თორნთონ (საქართველო), მომხმარებელს განახლებულ ინოვაციურ და მრავალფეროვან სერვისების პაკეტს სთავაზობს. კომპანიის მიერ არჩეული ახალი მიმართულება, უპასუხოს ბიზნესის სხვადასხვა სფეროში არსებულ თანამედროვე გამოწვევებს, მიზნად ისახავს  კომპანიების დღის წესრიგში არსებული სირთულეების გადაჭრის მდგრადი მეთოდების შეთავაზებას, რომლებიც ინდივიდუალურად, მათ საჭიროებებზე იქნება მორგებული.

–ბიზნეს კონსულტაცია– ბიზნეს ტრანსფორმაცია, მონაცემთა ანალიტიკა, ფინანსური მართვა და ოპერაციების გაუმჯობესება
– პროექტების მართვა და კონსულტაცია
– ფინანსური რისკები და მოდელირების სერვისები
– Due Diligence (ტრანზაქციების საკონსულტაციო სერვისები)
– შეფასება
– კვლევა & სტრატეგია 
– მდგრადი განვითარების (გარემოსდაცვითი, სოციალური და მმართველობითი ESG) საკითხები
– HR კონსულტაცია 
ეს იმ თემების არასრული ჩამონათვალია, რომლებზეც გრანთ თორნთონის გუნდი იქნება ორიენტირებული.

გრანთ თორნთონი მსოფლიოში ერთ-ერთი წამყვანი დამოუკიდებელი აუდიტორული, საგადასახადო და საკონსულტაციო კომპანიების ქსელია, რომელიც 150-ზე მეტ ქვეყანაში, 73,000-ზე მეტი თანამშრომლითაა წარმოდგენილი. კომპანია მომხმარებლებს მაღალი ხარისხის სერვისებს სთავაზობს.

2 ივლისს, თბილისის ისტორიის მუზეუმში “ქარვასლა”, ‘’საქართველოს პასუხისმგებელი ბიზნესის კონკურსი –  მელიორა 2024“-ის დაჯილდოების ცერემონია  გაიმართა, რომლის ფარგლებშიც წლის საუკეთესო პროექტები და კომპანიები დასახელდნენ, სადაც გერმანიის ეკონომიკური გაერთიანების (DWV) რამდენიმე წევრმა,  გამარჯვება მოიპოვა სხვადასხვა კატეგორიაში. დაჯილდოვდნენ საუკეთესო პროექტები და კომპანიები კორპორაციული სოციალური პასუხისმგებლობის (CSR) სფეროში, რომელთაც პრიზები დიპლომატიური კორპუსის წარმომადგენლებმა და სფეროს საერთაშორისო ექსპერტებმა გადასცეს.

თომას კიმესვენგერმა, გერმანიის ეკონომიკური გაერთიანების  (DWV) აღმასრულებელმა დირექტორმა, კატეგორია „სექტორთა პარტნიორობა – გაზიარებული პასუხისმგებლობა“ -ს  გამარჯვებულს „ზღაპარი“, პარტნიორობა ასოციაციასთან “ცხოვრების შანსი“, ჯილდო გადასცა.

DWV-ის წევრ კომპანიებს შორის დაჯილდოვდნენ: თეგეტა და თიბისი ბანკი

„თეგეტამ“გამარჯვება მოიპოვა პროექტით „მწვანე სტანდარტი“ კატეგორიაში „მწვანე ინიციატივა“.

„თიბისი ბანკმა“ გაიმარჯვა ორ კატეგორიაში – „წლის პასუხისმგებელი მსხვილი კომპანია“ და „გამჭვირვალობა და ანგარიშგება კორპორაციული პასუხისმგებლობისა და მდგრადობის საკითხებზე“.

ღონისძიება ჩატარდა CSRDG-ის მიერ, ევროკავშირისა (EU) და კონრად ადენაუერის ფონდის (KAS) მიერ დაფინანსებული პროექტის „სამოქალაქო საზოგადოების ინიციატივა“ ფარგლებში. ღონისძიების სპონსორები იყვნენ ასევე: სპონსორები: UN Women Georgia, Moore, Abc, ELEMENT HOLDING , Sarajishvili.

მთავრობის სხდომაზე „ბიოლოგიური მრავალფეროვნების შესახებ“ კანონის პროექტი განიხილეს და მხარი დაუჭირეს.

დოკუმენტი გარემოს დაცვისა და სოფლის მეურნეობის სამინისტრომ, გერმანიის საერთაშორისო თანამშრომლობის საზოგადოებისა (GIZ) და შვედეთის განვითარებისა და თანამშრომლობის სააგენტოს (SIDA) მხარდაჭერით მოამზადა.

სამინისტროს ინფორმაციით, ახალი კანონის მიღებით, ევროკავშირის დირექტივების შესაბამისად, საქართველოში განისაზღვრება დაცული სახეობებისა და ბინადართა ნუსხა. ხოლო ეროვნული „წითელი ნუსხა“ გახდება ბუნების დაცვის მსოფლიო კავშირის (IUCN) ნუსხის ანალოგიური.

კანონის ძირითადი ნაწილის ამოქმედება 2026 წლის 1 იანვრიდან იგეგმება, გარკვეული ნორმების ძალაში შესვლა კი 2027-2029 წლებში მოხდება, იუწყება სამინისტრო.

როგორც სამინისტრო აღნიშნავს, დღეის მდგომარეობით, ევროკავშირთან ასოცირების შეთანხმებით გათვალისწინებული 27 გარემოსდაცვითი რეგულაციიდან, საკანონმდებლო დაახლოება უკვე განხორციელებულია 20-თან.