Startseite » Recht und Steuern Ge
Category:

Recht und Steuern Ge

AktuellesRecht und Steuern GeTop-geWirtschaftწევრების სიახლეები

გრანთ თორნთონ საქართველო: შრომითი უფლებებისა და უსაფრთხოების საკითხების გაუმჯობესებისთვის

by DWV Admin
written by DWV Admin

გერმანიის ეკონომიკური გაერთიანების (DWV) წევრი კომპანია, გრანთ თორნთონ საქართველო კერძო მეწარმეობის საერთაშორისო ცენტრთან (CIPE) თანამშრომლობის  ფარგლებში აგრძელებს პროექტს – “შრომითი უფლებებისა და შრომის უსაფრთხოების საკანონმდებლო შესაბამისობა დამსაქმებელების ცნობიერების ასამაღლებლად“, რომელიც ხორციელდება ქვემო ქართლის, სამცხე-ჯავახეთისა და იმერეთის რეგიონებში.

აღნიშნული პროექტის ფარგლებში, გრანთ თორნთონის გამოცდილი ექსპერტები აქტივობებს უფასოდ ჩაატარებენ ქუთაისში, 30 ნოემბერს.  ტრენინგი განკუთვნილი იქნება დამსაქმებლებისთვის, მცირე და საშუალო ბიზნესის წარმომადგენლებისთვის, სტარტაპებისთვის, ქალებისთვის ბიზნესში.

პროექტის მიზანია დამსაქმებლების, მცირე და საშუალო ბიზნესის წარმომადგენლების, სტარტაპების, ქალებისა და ახალგაზრდების/სტუდენტების ცნობიერების ამაღლება შრომითი უფლებებისა და შრომის უსაფრთხოების საკანონმდებლო შესაბამისობის შესახებ.

საქართველოში სამართლიანი და გამჭვირვალე ბიზნეს გარემოს განვითარების მხარდასაჭერად, გრანთ თორნთონი დაეხმარება ადგილობრივ დამსაქმებლებს უსაფრთხო სამუშაო სივრცის შექმნაში. ეს ინიციატივა განაპირობებს ბიზნესის არა მხოლოდ შესაბამისობას საკანონმდებლო სტანდარტებთან, არამედ ხელს შეუწყობს უფრო უსაფრთხო და სამართლიან სამუშაო პირობების არსებობას.

დაინტერესებულ პირებს შეუძლიათ გაიარონ რეგისტრაცია 28 ნოემბრის ჩათვლით ამ ბმულზე. 

გრანთ თორნთონი მსოფლიოს ერთ-ერთი წამყვანი დამოუკიდებელი აუდიტორული და ბიზნეს საკონსულტაციო კომპანიების საერთაშორისო ქსელია. გრანთ თორნთონის წევრი ფირმები პროფესიონალური რჩევებით ეხმარებიან დინამიკურ ორგანიზაციებს საკუთარი სტრატეგიული ამბიციების განხორციელებაში. გრანთ თორნთონის გუნდის წევრები, პარტნიორთა ხელმძღვანელობით,  მაქსიმალურად იყენებენ საკუთარ ცოდნასა და გამოცდილებას იმისათვის, რომ კარგად გაიაზრონ საჯარო, თუ კერძო კომპანიების წინაშე მდგარი გამოწვევები და დაეხმარონ მათ პრობლემების გადაწყვეტაში. გრანთ თორნთონის 73,000 თანამშრომელი, 150 ქვეყანაში მუშაობს იმისათვის, რომ იყოს გამორჩეული კლიენტების, კოლეგებისა და საზოგადოებისათვის.

0 comments
0 FacebookTwitterPinterestEmail
Aktuellesnews-right-geRecht und Steuern GeTopnews-geWirtschaftწევრების სიახლეები

იმედი L: სადაზღვეო პაკეტები უცხოელთათვის საქართველოში

by DWV Admin
written by DWV Admin

გერმანიის ეკონომიკური გაერთიანების (DWV) წევრი კომპანიის, იმედი L-ის მრავალფეროვან პროდუქტების სიას, ახლა უკვე შეემატა ვიზიტორთა სადაზღვეო პაკეტი საქართველოში, რაც ქვეყანაში ჩამოსულ ტურისტებს, მოგზაურობის განმავლობაში ჯანმრთელობასთან დაკავშირებულ მოულოდნელ ხარჯებს დაუფარავს. იმედი L უზრუნველყოფს, რომ ვიზიტორებმა მშვიდად და სასიამოვნოდ გაატარონ დრო საქართველოში მოგზაურობისას. იმედი L-ში ვიზიტორთა სადაზღვეო პაკეტის გარდა, საქართველოში მცხოვრები უცხოელი სტუდენტების ჯანმრთელობის დაზღვევის შეძენაცაა შესაძლებელი. სასურველი სადაზღვეო პაკეტების შეძენა შესაძლებელია, როგორც ონლაინ, ასევე იუსტიციის სახლში.

იმედი L, თავისი 24-წლიანი ისტორიით პირველი სადაზღვევო კოპანიაა ქართულ ბაზარზე, რომელიც უმთავრესად ჯანმრთელობისა და მასთან დაკავშირებული რისკების დაზღვევაზეა ორიენტირებული. კომპანია არის საქართველოს ჯანდაცვის ჯგუფის წევრი, ეკოსისტემის, რომელიც გთავაზობთ სამედიცინო მომსახურებებისა და პროდუქტების სრულ სპექტრს.

0 comments
0 FacebookTwitterPinterestEmail
Aktuellesnews-right-geRecht und Steuern Geწევრების სიახლეები

ნექსია ახალ, პერსონალურ მონაცემთა დაცვის სერვისს ნერგავს.

by DWV Admin
written by DWV Admin

2024 წლის 1 მარტს, საქართველოში ძალაში შევიდა ახალი კანონი ,“პერსონალურ მონაცემთა დაცვის შესახებ“. მონაცემთა სათანადო დამუშავების მიზნით, ახალი კანონი მკაცრ საკანონმდებლო მოთხოვნებს აწესებს საჯარო და ბიზნეს ორგანიზაციებისთვის, რომლებიც დიდი რაოდენობით მონაცემებს ამუშავებენ. ახალი კანონი ორგანიზაციებს პერსონალური მონაცემების დამუშავების პოლიტიკის გაწერის ვალდებულებას აკისრებს, ხოლო  მთელ რიგ ორგანიზაციებს დამატებით, ოფიცრის აყვანა ევალებათ, რაც თავის მხრივ დიდი გამოწვევაა თანამედროვე ბიზნესის სექტორში.

პერსონალურ მონაცემთა დაცვის გამოწვევების საპასუხოდ, ნექსია საქართველომ ახალი სერვისი დანერგა. ის ორგანიზაციებს ახალი კანონის სწორ და კონსტრუქტიულ რეალიზებასა და თანამშრომელთა გადამზადებაში დაეხმარება. გარდა ამისა,  იზრუნებს ყველა საჭირო დოკუმენტის შედგენაზე და კომპანიების შიდა დოკუმენტების შესრულების პერიოდულ მონიტორინგს განახორციელებს.

ნექსია საქართველო 10 წელზე მეტია უკონკურენტოდ ოპერირებს საქართველოს ბაზარზე   და მომხმარებელს აუდიტის, გადასახადების, ბუღალტერიის, კონსალტინგის, იურიდიული მომსახურების, ციფრული ტექნოლოგიებისა და ლიცენზირებული პროგრამების სფეროებში სრულ მხარდაჭერას სთავაზობს.

0 comments
0 FacebookTwitterPinterestEmail
Aktuellesnews-right-genewsseite_top_geRecht und Steuern GeTop-geTopnews-ge

დემატერიალიზებული ფასიანი ქაღალდების ფლობის შესახებ კანონპროექტი

by DWV Admin
written by DWV Admin

2021 წლის 16 სექტემბერს, საქართველოს პარლამენტში ინიცირდა კანონპროექტი ,,დემატერიალიზებული ფასიანი ქაღალდების ფლობის შესახებ’’. მისი მიზანია,დემატერიალიზებული ფასიანი ქაღალდების ფლობისა და მიმოქცევასთან დაკავშირებულიურთიერთობების რეგულირება. კანონპროექტი ინფრასტრუქტურული და ფასიანიქაღალდების ბაზრის კანონმდებლობაში თანამედროვე სტანდარტების შემოღებას ემსახურება და იცავს ინვესტორებს. ამასთან, ფასიან ქაღალდებთან დაკავშირებული ვაჭრობა გახდება უფრო მოქნილი და შესაბამისად ლიკვიდური.

კანონპროექტი განსაზღვრავს დემატერიალიზებული ფასიანი ქაღალდების ცნებას დაამგვარად, ის ადგენს საქართველოში არსებულ ფასიანი ქაღალდების მესამე კატეგორიას. დემატერიალიზებული ფასიანი ქაღალდები არსებობს მხოლოდ ანგარიშზე ჩანაწერის სახით და მათზე საკუთრების უფლება დასტურდება სისტემის ამონაწერით. დემატერიალიზებული ფასიანი ქაღალდები თანამედროვე ტექნოლოგიების განვითარების შედეგად გაჩნდა, რომლის წყალობითაც აღარ არის საჭირო ფასიანი ქაღალდების მატერიალური ფორმით ფლობა ან მათი რეგისტრაცია.
კანონპროექტი ტოვებს ე.წ რეგისტირებული ფასიანი ქაღალდების რეჟიმს. ფასიანი ქაღალდი იქნება ისეთი ტიპის ქაღალდი, რომელიც შეიძლება იყოს კერძოდ გამოშვებული, ასევე შესაძლებელია მისი დემატერიალიზაციაც. რეგისტრირებული ფასიანი ქაღალდი, რეგისტრირებულია ფასიანი ქაღალდების რეესტრში და მასზე საკუთრების უფლებაც დასტურდება რეესტრში ჩანაწერით ან „სერთიფიკატით.ფასიანი ქაღალდების ბაზრის შესახებ საქართველოს კანონი ასევე არეგულირებს მატერიალური ფორმის ფასიან ქაღალდებს. მატერიალური ფორმით არსებობს საწარმდგენლო და საორდერო ფასიანი ქაღალდები. საწარმდგენლო ფასიან ქაღალდებზე საკუთრების უფლება
დასტურდება დოკუმენტის ფლობით, ხოლო საორდერო ფასიანი ქაღალდების შემთხვევაში მესაკუთრის ვინაობა დოკუმენტზეა მითითებული. მართალია, საქართველოს კანონი ფასიანი ქაღალდების ბაზრის შესახებ არეგულირებს არამატერიალურ ფასიან ქაღალდებს, თუმცა ის არ არეგულირებს დემატერიალიზებულ ფასიან ქაღალდებს. არამატერიალიზებული ფასიანი ქაღალდი განიმარტება, როგორც ფასიანი ქაღალდი, რომელიც არ არსებობს ქაღალდის ფორმით, მაგრამ არსებობს ჩანაწერის სახით ფასიანი ქაღალდების რეესტრში ან ნომინალური მფლობელების ჩანაწერებში რეგისტრირებული მესაკუთრის ან ნომინალური მფლობელის სახელზე, მაგალითად, არამატერიალიზებული ფასიანი ქაღალდი არის რეგისტრირებული ფასიანი ქაღალდი.

DWV აკვირდება კანონპროექტის განხილვის მიმდინარეობას და მისი ამოქმედებისთანავე გაცნობებთ იურიდიული სიახლის სახით.

0 comments
0 FacebookTwitterPinterestEmail
Aktuellesnews-right-genewsseite_top_geRecht und Steuern GeTop-geTopnews-ge

გერმანიაში მიღებულ იქნა ახალი აქტი ,,მიწოდების ქსელის სათანადო მოვლის’’ შესახებ.

by DWV Admin
written by DWV Admin

2021 წლის 11 ივნისს, გერმანიის ფედერალურმა პარლამენტმა და გერმანიის ფედერალურმა საბჭომ (2021 წლის 25 ივნისს) მიიღეს აქტი,, მიწოდების ქსელის სათანადო მოვლის შესახებ (“კანონი”). ახალი კანონი ვრცელდება იმ კომპანიებზე, რომლებსაც აქვთ სათაო ოფისი, ბიზნესის ძირითადი ადგილი, ადმინისტრაციული შტაბი ან რეგისტრირებული ოფისი გერმანიაში და დასაქმებული ყავთ 3000 -ზე მეტი თანამშრომელი. კანონი ასევე მოიცავს საზღვარგარეთ გერმანული კომპანიების აფილირებულ საწარმოებს. გარდა ამისა, ახალ კანონს ექვემდებარებიან ის უცხოური კომპანიებიც, რომლებსაც აქვთ ფილიალი გერმანიაში და დასაქმებულთა კანონით განსაზღვრული ზემოაღნიშნული რაოდენობა. 2024 წლიდან ეს ბარიერი 1000 თანამშრომელამდე შემცირდება.

კანონი ეხმიანება გაეროს ბიზნესისა და ადამიანის უფლებების სახელმძღვანელო პრინციპებს, რომლებიც ადამიანის უფლებების კორპორაციული პასუხისმგებლობის ყველაზე მნიშვნელოვან საერთაშორისოდ აღიარებულ სტანდარტებს შორისაა და კომპანიებს ავალდებულებს შეასრულონ, მიწოდების ქსელში საერთაშორისო დონეზე აღიარებული ადამიანის უფლებებისა და გარკვეული გარემოსდაცვითი სტანდარტების სათანადო დაცვის ვალდებულებები.

კანონის მიზანია გააუმჯობესოს ადამიანის უფლებრივი მდგომარეობა გლობალური მიწოდების ქსელთან ერთად, თავიდან აიცილოს, მაგალითად, ბავშვთა და იძულებითი შრომა და აიკრძალოს ნივთიერებები, რომლებიც საზიანოა ადამიანების და გარემოსთვის.

ახალი კანონით, კომპანიებმა უნდა უზრუნველყონ, რომ არ მოხდეს ადამიანის უფლებების დარღვევა საკუთარ და მიწოდების ქსელის საქმიანობაში, ასევე კომპანიებმა უნდა დანერგონ შესაბამისი პოლიტიკა ან მოარგონ უკვე არსებული რისკების მენეჯმენტი აღნიშნულ კანონს. კომპანიებმა ვალდებულნი არიან დაადგინონ არსებობს თუ არა რისკი იმისა, რომ საკუთარ ბიზნეს საქმიანობაში ან მიწოდების ქსელში შესაძლოა დაირღვეს ადამიანის უფლებები.

თუ კომპანიები არღვევენ ამ კანონიდან გამომდინარე თავიანთ სათანადო მოვლის ვალდებულებას, ისინი შესაძლოა დაჯარიმდნენ შესაბამისი ორგანოს –  გერმანიის ეკონომიკურ საქმეთა და ექსპორტის კონტროლის ფედერალური ოფისის (BAFA) – მიერ, ჯარიმა დგინდება დარღვევის სიმძიმისა და კომპანიის მთლიანი ბრუნვის მიხედვით.

ახალი კანონი ამოქმედდება 2023 წლის 1 იანვრიდან.

დამატებითი ინფორმაცია იხილეთ შემდეგ ბმულზე.

 

0 comments
0 FacebookTwitterPinterestEmail
news-right-geRecht und Steuern Ge

საკანონმდებლო სიახლე: კომერციულ ბანკებს კლიენტების შესახებ მონაცემების სებ-ში წარდგენის ვალდებულება დაეკისრათ

by DWV Admin
written by DWV Admin

საზედამხედველო ფუნქციების ეფექტიანი განხორციელებისა და სესხის გამცემი ორგანიზაციების მიერ სავალდებულო ანგარიშგების მარტივად წარდგენის ხელშეწყობის მიზნით, საქართველოს ეროვნული ბანკის პრეზიდენტის 2021 წლის 6 ივლისის # 88/04 ბრძანების საფუძველზე განისაზღვრა ,,ეროვნული ბანკის მიერ საკრედიტო რეესტრის შექმნისა და მისი გამოყენების წესი’’ .

აღნიშნული წესის ამოცანაა, ხელი შეუწყოს საკრედიტო რეესტრის მონაცემთა ბაზის შექმნისა და მისი გამოყენების პროცესს. ის იმ ღონისძიებებს განსაზღვრავს, რომლებიც მონაცემების უსაფრთხო გაზიარებას, მათ დამუშავებას და შენახვას უკავშირდება. წესი ასევე ადგენს პროცესებში ჩართული მხარეების უფლება-მოვალეობებს.

საკრედიტო რეესტრი ის მონაცემთა ბაზაა, რომელიც სესხის გამცემი ორგანიზაციების საკრედიტო პორტფელის შესახებ მონაცემებს მოიცავს. ეროვნულ ბანკს ყოველთვიურად შემდეგი მონაცემები წარედგინება:

  • მომხმარებლის საიდენტიფიკაციო მონაცემები
  • მომხმარებლის ბოლო განახლებული ფინანსური მონაცემები
  • საკრედიტო ვალდებულების დეტალები
  • საკრედიტო ვალდებულების უზრუნველყოფის მონაცემები
  • ინფორმაცია რეფინანსირებულ სესხებზე
  • ინფორმაცია ინვესტიციების შესახებ
  • ინფორმაცია უარყოფილი საკრედიტო განაცხადების შესახებ
  • ინფორმაცია საანგარიშგებო თვის განმავლობაში დახურული სესხების შესახებ

ამასთან, ეროვნული ბანკი უზრუნველყოფს საკრედიტო რეესტრის მონაცემების დამუშავებას და, კანონმდებლობით გათვალისწინებულ შემთხვევებში, მონაცემების გადაცემას „პერსონალურ მონაცემთა დაცვის შესახებ“ საქართველოს კანონის შესაბამისად.

აღსანიშნავია, რომ ნებისმიერ პირს, რომელიც არ არის კომერციული ბანკი, უფლება აქვს გახდეს საკრედიტო რეესტრის მონაწილე. აღნიშნულ შემთხვევაში შესაბამის პირზე გავრცელდება ამ წესის მოთხოვნები.

კომერციული ბანკი ვალდებულია ინფორმაცია გადაუგზავნოს ეროვნულ ბანკს ყოველი თვის 20 (ოცი) რიცხვამდე , 2023 წლამდე იანვრამდე , ხოლო შემდგომ  – ყოველი თვის 10 რიცხვამდე.

ცვლილებები ძალაში შედის 2021 წლის 7 ივლისიდან.

დამატებითი ინფორმაცია იხილეთ ბმულზე .

0 comments
0 FacebookTwitterPinterestEmail
AGRICULTURAL LAND WORTH OVER 100M LARI COULD BE ADDITIONALLY PASSED INTO PRIVATE OWNERSHIP
news-right-geRecht und Steuern GeTop-ge

საკანონმდებლო სიახლე: განახლდა უცხოელებისთვის მიწის შეძენის წესი (საინვესტიციო გეგმის საფუძველზე)

by DWV Admin
written by DWV Admin

2021 წლის 18 მაისიდან უცხოელებს შეუძლიათ შეიძინონ სასოფლო-სამეურნეო დანიშნულების მიწის ნაკვეთი  საინვესტიციო გეგმის წარდგენის საფუძველზე

„სასოფლო-სამეურნეო დანიშნულების მიწის საკუთრების შესახებ“ საქართველოს ორგანული კანონის შესაბამისად  უცხოელს შეუძლია საკუთრებაში ფლობდეს სასოფლო სამეურნეო დანიშნულების მიწის ნაკვეთს თუ:

  • მან ეს მიწა მემკვიდრეობით მიიღო;
  • უცხოელი (მათ შორის იურიდიული პირი) არის ფინანსური ინსტიტუტის დომინანტი პარტნიორი  და აღნიშნული ფინანსური ინსტიტუტი საკუთრების უფლებით ფლობს სასოფლო-სამეურნეო დანიშნულების მიწის ნაკვეთს საქართველოს კანონმდებლობით ნებადართული საქმიანობის განხორციელების ფარგლებში (მათ შორის, უზრუნველყოფის საგნის კრედიტორის მიერ შეძენის შემთხვევაში);
  • საინვესტიციო გეგმის საფუძველზე საქართველოს მთავრობის გადაწყვეტილებით;

მართალია აღნიშნული კანონი 2019 წლის 25 ივნისს მიიღო პარლამენტმა, თუმცა დღემდე მოსაწესრიგებელი რჩებოდა უცხოელის მიერ ინვესტიციის საფუძველზე სასოფლო სამეურნეო დანიშნულების მიწის ნაკვეთის შეძენის წესი. სწორედ აღნიშნული პრობლემის მოგვარების მიზნით, 2021 წლის 18 მაისს საქართველოს მთავრობამ მიიღო დაგდენილება N:222 „საინვესტიციო გეგმის წარდგენისა და საინვესტიციო გეგმასთან დაკავშირებით გადაწყვეტილების მიღების წესის დამტკიცების შესახებ“.

მნიშვნელოვანი სიახლეები, რომლებიც დადგენილებაშია გათვალისწინებული:

  • დადგენილების მიზანია „სასოფლო-სამეურნეო დანიშნულების მიწის საკუთრების შესახებ“ საქართველოს ორგანული კანონით გათვალისწინებული შემთხვევისთვის საინვესტიციო გეგმის წარდგენისა და საინვესტიციო გეგმასთან დაკავშირებით გადაწყვეტილების მიღების პროცედურების დადგენა, რომლითაც სასოფლო-სამეურნეო დანიშნულების მიწის ნაკვეთზე საკუთრების უფლების მოპოვება შეეძლება საქართველოში რეგისტრირებულ კერძო სამართლის იურიდიულ პირს, რომლის დომინანტი პარტნიორია უცხოელი ან/და საზღვარგარეთ რეგისტრირებული იურიდიული პირი.
  • დადგენილებაში დეტალურად არის გაწერილი საინვესტიციო გეგმის წარდგენის, განხილვის, გადაწყვეტილების მიღებისა და ამ გეგმის შესრულების მონიტორინგის პროცედურები. წარდგენილი საინვესტიციო გეგმა უნდა მოიცავდეს შემდეგი სახის ინფორმაციას:
  1. საინვესტიციო გეგმის მიზანს და მის აღწერას;
  2. საინვესტიციო გეგმის განხორციელების დეტალურ გეგმა-გრაფიკს და მის აღწერას;
  3. ინვესტიციის წყაროს და მოცულობას;
  4. დასაქმებული პირების რაოდენობის შესახებ;
  5. ინფრასტრუქტურის მოწყობას ან/და არსებულის აღწერას;
  6. პროდუქციის/წარმოების/მომსახურების დაგეგმილ მოცულობას;
  7. ტექნოლოგიურ ან/და საწარმოო პროცესს და მის აღწერას;
  8. ინოვაციური საქმიანობის აღწერას (თუ საინვესტიციო გეგმა ითვალისწინებს ამგვარს);
  9. თანამედროვე ტექნოლოგიების დანერგვას და მის აღწერას (თუ საინვესტიციო გეგმა ითვალისწინებს ამგვარს);
  10. გარემოზე ზემოქმედების შეფასების ანგარიშს.
  • ინვესტორისთვის დაწესებულია ე.წ საინვესტიციო გეგმის განხორციელებისთვის გაწეული მომსახურების საფასურის გადახდა, რომელიც შეადგენს საინვესტიციო გეგმით გათვალისწინებული ინვესტიციის მოცულობის 1%-ს, მაგრამ არანაკლებ 1 000 და არაუმეტეს 30 000 ლარს, დამატებითი საფასურის გადახდა არის ასევე გათვალისწინებული საინვესტიციო გეგმაში ცვლილების განხილვისთვის.
  • საქართველოს მთავრობის მიერ საინვესტიციო გეგმის მოწონების შემთხვევაში ინვესტორი ასევე ვალდებულია წარადგინოს საბანკო გარანტია საინვესტიციო ვალდებულების 2% -ის ოდენობით, თუმცა აღნიშნული საბანკო გარანტია უნდა იყოს გაცემული მხოლოდ ქართული და არა უცხო ქვეყნის ფინანსური/სადაზღვევო კომპანიის მიერ.
  • მნიშვნელოვანი გარემოებაა, რომ საინვესტიციო გეგმის შესრულებისთვის ინვესტორის მიერ გაწეული ხარჯი უნდა შეადგენდეს მიწის ნაკვეთის ღირებულების არანაკლებ ოთხმაგ ოდენობას.
  • საინვესტიციო გეგმის მოწონების ან უარის თქმის თაობაზე გადაწყვეტილებას იღებს საქართველოს მთავრობა. მოწონების შემთხვევაში უცხოელს შესაძლებლობა ეძლევა მთავრობასთან დადოს შესაბამისი ხელშეკრულება და მიწა დაარეგისტრიროს საინვესტიციო გეგმის პირობების შესრულების ვალდებულებით.
  • საინვესტიციო გეგმის შეუსრულებლობის შემთხვევაში, პირი დაჯარიმდება  იმ პერიოდში განსახორციელებელი ინვესტიციის მოცულობის 2%-ის ოდენობით და ვალდებულების შესრულებისათვის ერთჯერადად მიეცემა ვადა არაუმეტეს 1 წლის ვადით. ხოლო ამ ვადის უშედეგოდ გასვლის შემთხვევაში მიწის მდგრადი მართვისა და მიწათსარგებლობის მონიტორინგის ეროვნული სააგენტო ამზადებს დასკვნას და წარუდგენს მინისტრს გადაწყვეტილების მიღების მიზნით.
  • საინვესტიციო გეგმით გათვალისწინებული ვალდებულებების შესრულების დადასტურების მიზნით, პირი, ყოველწლიურად წარადგენს გასული საანგარიშო წლის ნაკისრი ვალდებულების შესრულების თაობაზე შუალედურ საექსპერტო/აუდიტორულ დასკვნას.

დამატებითი ინფორმაცია იხილეთ ბმულზე

0 comments
0 FacebookTwitterPinterestEmail
news-right-geRecht und Steuern Ge

საკანონმდებლო სიახლე: კანონი „რეაბილიტაციისა და კრედიტორთა კოლექტიური დაკმაყოფილების შესახებ’’

by DWV Admin
written by DWV Admin

2021 წლის 1 აპრილიდან ამოქმედდა ახალი კანონი „რეაბილიტაციისა და კრედიტორთა კოლექტიური დაკმაყოფილების შესახებ“ რომელმაც  ჩაანაცვლა  ძველი კანონი ,,გადახდისუუნარობის საქმის წარმოების შესახებ’’

ახალი კანონით შეიცვალა  გადახდისუუნარობის საქმის წარმოების მთავარი პრინციპი რაც მდგომარეობს კრედიტორთა მოთხოვნების კოლექტიური დაკმაყოფილებას რეაბილიტაციის მიღწევის გზით, ხოლო რეაბილიტაციის შეუძლებლობის შემთხვევაში გადახდისუუნარობის მასის რეალიზაციიდან მიღებული თანხების განაწილების გზით.

მნიშვნელოვანი სიახლეები, რომლებიც დადგენილებაშია გათვალისწინებული:

  • ახალი კანონით რეაბილიტაციის/გაკოტრების მმართველი რეაბილიტაციის და რეგულირებული შეთანხმების ზედამხედველი შეიძლება იყოს მხოლოდ გადახდისუუნაორბის პრაქტიკოსი. აღნიშნული პროფესია სიახლეა ქართულ კანონმდებლობაში. გადახდისუუნარობის პრაქტიკოსის შეირჩევა ავტომატურად, ელექტრონული სისტემის მეშვეობით, საქმეთა შემთხვევითი განაწილების პრინციპის დაცვით მოხდება.
  • კანონი აგრეთვე ახლებურად აწესრიგებს გადახდისუუნარობის შესახებ განცხადების წარდგენის, მისი განხილვის, რეაბილიტაციისა თუ გაკოტრების რეჟიმის დაწყების, საქმის წარმოების ელექტრონული სისტემის ორგანიზებისა და სხვა საკითხებს.
  • ვინაიდან ახალი კანონის ერთ ერთი მიზანია მოვალე კომპანიის გაკოტრების თავიდან აცილება, რეაბილიტაციის რეჟიმს ცალსახა და უპირობო პრიორიტეტი ენიჭება. კანონში გათვალისწინებულია რეაბილიტაციის წამახალისებელი არაერთი მექანიზმი როგორიცაა გაკოტრების რეჟიმის რეაბილიტაციაში კონვერსიის შესაძლებლობა, ასევე რეგულირებული შეთანხმების მექანიზმი, რაც  სრულიად ახალია ქართული სამართლისთვის; აღნიშნული მექანიზმი საშუალებას აძლევს მხარეებს, სასამართლოს ჩარევის გარეშე  მიაღწიონ შეთანხმებას. აღნიშნული ითვალისწინებს გადახდისუუნარობის წინაშე მყოფ მოვალესა და კრედიტორებს შორის შეთანხმებას იმის თაობაზე, რომ თითოეული კრედიტორი მიიღებს მინიმუმ იმდენს, რასაც ის მოვალის გაკოტრებისას მიიღებდა. ამ პროცესის მიზანია მოვალის, როგორც მოქმედი საწარმოს, შენარჩუნება. რეგულირებული შეთანხმების დადების მიზნით წარმართულ მოლაპარაკებებზე ვრცელდება მორატორიუმი. ამ პერიოდში მოვალის მიმართ ინდივიდუალური აღსრულების პროცესი შეჩერებულია.
  • სასამართლოში მოვალის მიმართ რეაბილიტაციის რეჟიმის დაწყების მოთხოვნით შეტანილ განცხადებას უპირატესობა ენიჭება გაკოტრების რეჟიმის დაწყების მოთხოვნით შეტანილ განცხადებასთან შედარებით მაშინაც კი, თუ გაკოტრების რეჟიმის დაწყების შესახებ განცხადება უფრო ადრე იქნა შეტანილი. სასამართლო უპირველესად იხილავს განცხადებას მოვალის მიმართ რეაბილიტაციის რეჟიმის დაწყების შესახებ;
  • მაშინაც კი, თუ დაკმაყოფილდება კრედიტორის განცხადება რეაბილიტაციის შესახებ, სასამართლოს შეუძლია, დატოვოს მართვაში მოვალე, თუკი ის დაასაბუთებს, რომ სამეწარმეო საქმიანობას უძღვებოდა კეთილსინდისიერად. მოვალის მართვაში დატოვებისას სასამართლო მოვალეს უნიშნავს რეაბილიტაციის ზედამხედველს.
  • ახალი კანონი აწესებს მრავალ ინსტრუმენტს მოვალის ქონების მაქსიმალურად მაღალი ღირებულებით რეალიზაციისათვის; მხოლოდ სტანდარტული აუქციონის ჩატარების ნაცვლად, როგორც წინა კანონით იყო განსაზღვრული, წესდება რეალიზაციის ფორმების სიმრავლე, რომლის მიხედვითაც არჩევანს განაპირობებს მმართველის ვალდებულება, შეარჩიოს ყველაზე ეფექტიანი ფორმა რეალიზაციისათვის.

ახალი კანონი ძალაში შევიდა 2021 წლის 1 აპრილიდან.
დამატებითი ინფორმაცია იხილეთ  შემდეგ ბმულზე.

0 comments
0 FacebookTwitterPinterestEmail
news-right-geRecht und Steuern GeTopnews-ge

DWV-მ პარლამენტს წარუდგინა მოსაზრება ,,ქარსაფარი (მინდორდაცვითი) ზოლის შესახებ’’ კანონპროექტთან დაკავშირებით

by DWV Admin
written by DWV Admin

2021 წლის 15 ივნისს  ა(ა)იპ გერმანიის ეკონომიკური გაერთიანებამ  (Deutsche Wirtschaftsvereinigung) საქართველოს პარლამენტის აგრარულ კომიტეტს წარუდგინა მის წევრებთან (აჭარა ჯგუფი და სხვა)  ერთად მომზადებული მოსაზრება,  საქართველოს პარლამენტის წევრების,  ნინო წილოსანის, ალექსანდრე მოწერელიას, ხატია წილოსანის, ირაკლი (დაჩი) ბერაიას, შალვა კერესელიძის, ზაალ დუგლაძის, სამველ მანუკიანის, გოდერძი ჩანქსელიანიის მიერ ინიცირებულ ,,ქარსაფარი (მინდორდაცვითი) ზოლის შესახებ‘’ საქართველოს კანონის პროექტთან დაკავშირებით.

გერმანიის ეკონომიკური გაერთიანება მიესალმება და სრულად იზიარებს წარმოდგენილი საკანონმდებლო პაკეტის ძირითად არსს და მიზანს, რაც თავის მხრივ საფუძველს უყრის განისაზღვროს ქარსაფარ ზოლებთან დაკავშირებული სახელმწიფო პოლიტიკა და დადგინდეს ქარსაფარი ზოლების აღდგენასთან, გაშენებასთან, მოვლასთან და დაცვასთან დაკავშირებული სამართლებრივი ურთიერთობები. მიგვაჩნია, რომ აღდგენილი და სათანადო წესების დაცვით მოვლილი ქარსაფარი ზოლები მნიშვნელოვან კონტრიბუციას შეიტანს საქართველოს სასოფლო-სამეურნეო კულტურების გაზრდასა და განვითარებაში.

მნიშვნელოვანი სიახლეები, რომლებიც კანონპროექტით არის გათვალისწინებული:

  • კანონპროექტი არეგულირებს მხოლოდ სასოფლო-სამეურნეო დანიშნულების მიწის ნაკვეთის ან მისი ნაწილისათვის ქარსაფარი (მინდორდაცვითი) ზოლის სტატუსის მინიჭებასთან, ქარსაფარი ზოლის აღდგენასთან, გაშენებასთან, აღრიცხვასთან, სარგებლობასა და მართვასთან დაკავშირებულ სამართლებრივ ურთიერთობებს.
  • ქარსაფარი ზოლის სტატუსი ენიჭება მიწის ნაკვეთს ან მის ნაწილს, რომელზეც გაშენებულია ან უნდა გაშენდეს ქარსაფარი ზოლი. მიწის ნაკვეთს ქარსაფარი ზოლის სტატუსი ენიჭება საქართველოს გარემოს დაცვისა და სოფლის მეურნეობის სამინისტროs (შემდგოში ,,სამინისტრო’’) მიერ ჩატარებული ინვენტარიზაციის ან სპეციალური მოკვლევის საფუძველზე.  ქარსაფარი ზოლის სტატუსი მინიჭებულად ითვლება უძრავ ნივთებზე უფლებათა რეესტრში მისი საზღვრების რეგისტრაციის მომენტიდან.
  • პირველ ეტაპზე საქართველოს გარემოს დაცვისა და სოფლის მეურნეობის სამინისტრო ჩაატარებს ქარსაფარი ზოლების ინვენტარიზაციას. რაც გულისხმობს სახელმწიფოს მიერ საქართველოს ტერიტორიაზე არსებული ქარსაფარი ზოლების ფაქტობრივი მდგომარეობის აღწერას იმ ტერიტორიების გამოვლენისთვის სადაც ქარსაფარი ზოლი სრულად ან ნაწილობრივ არის შენარჩუნებული.
  • ქარსაფარი ზოლის გაშენების მიზანშეწონილობის განსასაზღვრად ამისთვის უფლებამოსილი სააგენტო ახორციელებს სპეციალურ მოკვლევას. სპეციალური მოკვლევის დაწყების საფუძველია:
  1. სააგენტოს საკუთარი ინიციატივა;
  2. სამინისტროს შუამდგომლობა
  3. მუნიციპალიტეტის შუამდგომლობა
  4. მიწის ნაკვეთის მესაკუთრე ფიზიკური ან კერძო სამართლის იურიდიული პირის მიერ მის საკუთრებაში არსებული მიწის ნაკვეთის თაობაზე ან სხვა დაინტერესებული პირის მიერ სააგენტოში წარდგენილი განცხადება.
  • სპეციალური მოკვლევის საფუძველზე კერძო საკუთრებაში არსებულ მიწის ნაკვეთის ან მის ნაწილისათვის ქარსაფარი ზოლის სტატუსის მინიჭების და მასზე ქარსაფარი ზოლის გაშენების თაობაზე გადაწყვეტილება მიიღება მხოლოდ მესაკუთრის თანხმობის საფუძველზე.
  • ქარსაფარი ზოლის აღდგენა-გაშენების დაგეგმვის პროცესში გათვალისწინებულია ადგილობრივი ქარის სიძლიერე.
  • მესაკუთრეს შეუძლია გამოიყენოს ქარსაფარი ზოლი არაფუნქციურად, რაც გულისხმობს ასეთი სტატუსის მქონე მიწის ნაკვეთის ან მისი ნაწილის ქარსაფარი ზოლში არსებული ამორტიზებული მერქნული რესურსებით, აგრეთვე, მერქნიანი მცენარეების პროდუქტებით, არამერქნული რესურსებით (სოკო, სამკურნალო და საკვები ბალახეულობა, ტექნიკური ნედლეული, თუთის ფოთოლი, ბუჩქოვანი მცენარეების პროდუქტები და სხვ.) და ხის მეორეხარისხოვანი მასალით (თესლი, ნაყოფი, კალამი, ძირკვი, ფიჩხი, ნეკერი და სხვ.) სარგებლობას.
  • კერძო საკუთრებაში არსებული ქარსაფარი ზოლის მოვლა ევალება მიწის მესაკუთრეს.

ვადები:
კანონპროექტით განსაზღვრულია შემდეგი ვადები:

  • 2022 წლის 1-ელ მარტამდე სამინისტროს მიერ ქარსაფარი ზოლების ინვენტარიზაციის გეგმის მომზადება.
  • 2025 წლის 1-ელ მარტამდე არსებული გეგმის მიხედვით ქარსაფარი ზოლის ინვენტარიზაცია. აღნიშნულ ვადაში ეძლევათ კერძო მესაკუთრეებს შესაძლებლობა გააკეთონ განცხადება შესაბამისი სააგენტოს სახელზე ქარსაფარი ზოლის მოკვლევის და აღდგენა/განაშენიანების შესახებ.

გერმანიის ეკონომიკური გაერთიანების მიერ პარლამენტისთვის წარდგენილი მოსაზრება (ქართულ ენაზე), შეგიძლიათ იხილოთ შემდეგ ბმულზე.
კანონპროექტი შეგიძლიათ იხილოთ შემდეგ ბმულზე.

0 comments
0 FacebookTwitterPinterestEmail
news-right-geRecht und Steuern GeTopnews-ge

საკანონმდებლო სიახლე: კანონი შენობების ენერგოეფექტურობის შესახებ

by Timo Roujean
written by Timo Roujean

,,შენობების ენერგოეფექტურობის შესახებ’’ საქართველოს კანონი, რომელიც პარლამენტმა მიიღო 2020 წლის 21 მაისს, ითვალისწინებს შენობების ენერგოეფექტურობის მინიმალური მოთხოვნების ამოქმედებას 2021 წლის 30 ივნისიდან. თუმცა, COVID-19 პანდემიით გამოწვეული სიტუაციის გამო ამ პერიოდში ვერ ესწრება მშენებლობის ნებართვის გამცემ ორგანოებში (მუნიციპალიტეტები და სსიპ „ტექნიკური და სამშენებლო ზედამხედველობის სააგენტო“) სათანადო კადრების მომზადება, რომლებმაც უნდა უზრუნველყონ ამ მოთხოვნების ადმინისტრირება მშენებლობის ნებართვის გაცემის პროცესში.

შესაბამისად, 2021 წლის 10 ივნისს საქართველოს პარლამენტმა მიიღო კანონი „შენობების ენერგოეფექტურობის შესახებ საქართველოს კანონში ცვლილების შეტანის თაობაზე“. აღნიშნული კანონის მიხედვით დადგინდა შენობების ენერგოეფექტურობის მინიმალური მოთხოვნების ამოქმედების ვადა 2022 წლის 30 ივნისიდან , ნაცვლად  – 2021 წლის 30 ივნისისა.

 აქვე შეგახსენებთ, რომ ,,შენობების ენერგოეფექტურობის შესახებ’’  კანონის მიღება განაპირობა  ევროკავშირის ენერგეტიკული გაერთიანების დამფუძნებელ ხელშეკრულებასთან საქართველოს შეერთებამ, რომელის თანახმადაც საქართველომ უნდა განახორციელოს ევროპარლამენტისა და საბჭოს 2010 წლის19 მაისის დირექტივა 2010/31/EU შენობების ენერგოეფექტურობის შესახებ(EPBD) და ევროპარლამენტისა და საბჭოს 2012 წლის 25 ოქტომბრის დირექტივა 2012/27/EU ენერგოეფექტურობის შესახებ(EED).’’

დამატებითი ინფორმაცია იხილეთ ბმულზე.

0 comments
0 FacebookTwitterPinterestEmail
news-right-geNicht kategorisiertRecht und Steuern Ge

მოქალაქეებს „112“-ის წინაშე დაგროვილი დავალიანება ჩამოეწერებათ

by Timo Roujean
written by Timo Roujean

პარლამენტმა დაამტკიცა კანონი, რომლის მიხედვით, მოქალაქეებს „112“-ის წინაშე დაგროვილი დავალიანება ჩამოეწერებათ. საქართველოს პარლამენტმა დაამტკიცა კანონი, რომლის მიხედვით, მოქალაქეებს „112“-ის წინაშე დაგროვილი დავალიანება ჩამოეწერებათ.

აღნიშნული ცვლილების თანახმად, პირებს, რომელთა ავტომობილიც, კანონის შესაბამისად, საზოგადოებრივი უსაფრთხოების მართვის ცენტრი „112“-ის დაცულ ავტოსადგომზე 2020 წლის 1 სექტემბრამდე განთავსდა და დღემდე არ მომხდარა მათი გაყვანა, ერთჯერადად, 100 ლარის გადახდის სანაცვლოდ, საშუალება ეძლევათ, დაიბრუნონ საკუთარი ავტომობილი. ამასთან, მათ სრულად ჩამოეწერებათ „112-ის“ წინაშე დაგროვილი დავალიანება, რომლის საერთო ოდენობა, დღეის მდგომარეობით, 4 მილიონამდე ლარს შეადგენს.

აღნიშნული შეღავათით სარგებლობა უფლებამოსილ პირებს კანონის ამოქმედებიდან 3 თვის განმავლობაში შეეძლებათ.

4 მილიონ ლარამდე დაგროვილი დავალიანების ჩამოწერა მოქალაქეებისთვის მნიშვნელოვანი შეღავათი იქნება, პანდემიით გამოწვეული ეკონომიკური პრობლემების გათვალისწინებით.

გარდა ამისა, მიღებული საკანონმდებლო ცვლილებათა პაკეტით შეიქმნა სპეციალურ დაცულ სადგომზე გადაყვანილი ავტომანქანების ადმინისტრირებისა და მათი სადგომიდან გაყვანის ეფექტიანი მექანიზმი, რაც სამომავლოდ გამორიცხავს მოქალაქეთათვის მსგავსი დავალიანების დაგროვების რისკებს.

აღსანიშნავია, რომ საქართველოს შინაგან საქმეთა სამინისტროს საზოგადოებრივი უსაფრთხოების მართვის ცენტრი „112“-ის საქმიანობის ერთ-ერთ მნიშვნელოვან მიმართულებას წარმოადგენს სატრანსპორტო საშუალებათა ევაკუატორით ან თავისი სვლით გადაადგილებისა და დგომის უზრუნველყოფა. ეს მიმართულება მოიცავს საქართველოს კანონმდებლობის შესაბამისად სატრანსპორტო საშუალების დაცულ სადგომზე გადაყვანასა და აღნიშნულ სადგომზე მისი დგომის უზრუნველყოფას.

 

0 comments
0 FacebookTwitterPinterestEmail
legal news tyit sargeblobis wesi
news-right-geRecht und Steuern GeTopnews-ge

საკანონმდებლო სიახლე: საქართველოს მთავრობამ ახალი ტყითსარგებლობის წესი დაამტკიცა

by DWV Admin
written by DWV Admin

საქართველოს მთავრობამ 2021 წლის 10 მაისს გამართულ სხდომაზე ახალი ტყითსარგებლობის წესი მიიღო. აღნიშნული კანონქვემდებარე აქტი სრულ შესაბამისობაშია 2020 წლის მაისში საქართველოს პარლამენტის მიერ დამტკიცებული ახალი „ტყის კოდექსით” დადგენილ ტყის მდგრადი მართვის პრინციპებთან.

ახალი „ტყითსარგებლობის წესი“ ადგენს ტყით მდგრადი მართვისა და სარგებლობის სამართლებრივ მექანიზმებს, რაც უზრუნველყოფს ტყეების რესურსებით მდგრად სარგებლობას ტყის ეკოლოგიური ღირებულებებისა და მახასიათებლების გაუმჯობესების, დაცვისა და შენარჩუნების პირობებში.

მნიშვნელოვანი სიახლეები, რომლებიც დადგენილებაშია გათვალისწინებული:
– ახალი წესის თანახმად, საშეშე და სამასალე მერქანის დამზადებას მხოლოდ ტყის მართვის ორგანოები უზრუნველყოფენ, შესაბამისი წესით დაახარისხებენ და განათავსებენ დასაწყობების ადგილებზე (ე.წ. საქმიან ეზოებში), რომლებიც საქართველოს ყველა მუნიციპალიტეტში იფუნქციონირებს.

– რესურსის მოპოვების უფლების მქონე პირი ვალდებულია წლის ბოლოს წარადგინოს ანგარიში მოპოვებული რესურსის შესახებ და გადაიხადოს ბუნებრივი რესურსით სარგებლობის მოსაკრებლების შესახებ კანონით განსაზღვრული მოსაკრებელი.

– ტყის რესურსების რეალიზაცია მოხდება როგორც აუქციონის წესით (ძირითადად, მაღალი ხარისხის სამასალე მერქანი), ისე პირდაპირი მიყიდვის გზით (შეშა და ხე-ტყის ნარჩენი).

– განსაკუთრებით აღსანიშნავია, რომ წესით ასევე დადგინდა ახალი სპეციალური ტყითსარგებლობის სახეები – ტყის არამერქნული რესურსების, მერქნიანი მცენარეების პროდუქტებისა და ხის მეორეხარისხოვანი მასალების დამზადება, ეს უკანასკნელი აქტიურად გამოიყენება ალტერნატიული და ეკოლოგიური ენერგიის წყაროების საწარმოებლად (ბრიკეტები, პელეტები) და მნიშვნელოვანი რგოლია ტყეზე ზეწოლის შემცირებისთვის. კომერციული მიზნით ტყის არამერქნული რესურსებით სარგებლობის უფლება გაიცემა იურიდიულ პირებზე, რომლებიც წარადგენენ განცხადებას და სათანადო დოკუმენტაციას ტყის მართვის ორგანოში. ასეთი რესურსებით კომერციული მიზნებისთვის სარგებლობა ახალი წესის მიღებამდე აკრძალული იყო.

– მოსახლეობისთვის არამერქნული ტყის პროდუქტებით, როგორიცაა, ასკილი, მაყვალი, ჟოლო და სხვა, სარგებლობა არ იკრძალება.

– ახალმა კანონმა და ერთობლივად ბაზარზე არსებული მოთხოვნის გათვალისწინებით, შესაძლებელი გახადა საკურორტო, რეკრეაციული, სპორტული და სხვა კულტურულ-გამაჯანსაღებელი მიზნებით ტყითსარგებლობა.

ცვლილებები ძალაში შედის 2021 წლის 18 მაისიდან.
დამატებითი ინფორმაცია იხილეთ ბმულზე

0 comments
0 FacebookTwitterPinterestEmail
Legal Report 02.02.2021
news-right-geRecht und Steuern Ge

სააღსრულებლო კოდექსის კანონპროექტი

by DWV Admin
written by DWV Admin

კანონპროექტის შემუშავების ერთ-ერთ მთავარ საფუძველს წარმოადგენს 1999 წლის 16
აპრილს მიღებული „სააღსრულებო წარმოებათა შესახებ“ საქართველოს კანონის
შეუსაბამობა თანამედროვე გამოწვევებთან. ასევე, კანონპროექტის მომზადების ერთ-ერთ
მიზეზს აღსრულების დღეს მოქმედი შერეული სისტემის არაეფექტურობა წარმოადგენს.
არსებული სისტემის მიხედვით, აღსრულების კომპეტენცია აქვს, როგორც აღსრულების
ეროვნულ ბიუროს, ასევე კერძო აღმასრულებელს. მნიშვნელოვანია, აღინიშნოს, რომ დღეს
აღსრულების ეროვნული ბიურო ვალდებულია წარმოებაში მიიღოს ყველა ტიპის და
კატეგორიის საქმე, განსხვავებით კერძო აღმასრულებლისგან.

კოდექსის მიღების მიზანია აღსრულების ახალი, ეფექტიანი სისტემის ჩამოყალიბება,
სააღსრულებო პროცესში მონაწილე პირთა უფლება-მოვალეობების გამიჯვნა და მკაფიოდ
ფორმულირება, სააღსრულებო პროცესის გამარტივება, აგრეთვე როგორც აღსრულების
პროცესში, ისე მის მიღმა არსებული სერვისების გაუმჯობესება და მომხმარებლისთვის
ახალი სერვისების შეთავაზება.

დამატებითი ინფორმაციის სანახავად გადადით ბმულზე

0 comments
0 FacebookTwitterPinterestEmail
Legal Peport_National Bank of Georgia_31.03.21
news-right-geRecht und Steuern Ge

საკანონმდებლო სიახლე: ფინანსური ორგანიზაციების მიერ მომხმარებელთა უფლებების დაცვის ახალი წესები

by DWV Admin
written by DWV Admin

საქართველოს ეროვნული ბანკის პრეზიდენტის ბრძანება ფინანსური ორგანიზაციების მიერ მომსახურების გაწევისას მომხმარებელთა უფლებების დაცვის წესის დამტკიცების თაობაზე მიზნად ისახავს ფინანსური სექტორის მომხმარებელთა უფლებების დაცვის სტანდარტის ამაღლებას.

ბრძანებაში განსაზღვრული ნორმები სავალდებულოა  საქართველოში მოქმედი ყველა კომერციული ბანკისათვის და უცხოური ბანკების ფილიალებისათვის, მიკროსაფინანსო ორგანიზაციებისათვის, არასაბანკო სადეპოზიტო დაწესებულებებისათვის – საკრედიტო კავშირებისთვის და სესხის გამცემი სუბიექტებისთვის.

ბრძანების მიზნებიდან გამომდინარე, მომხმარებელში იგულისხმება საფინანსო პროდუქტის მიმღები ან ასეთი განზრახვის მქონე ფიზიკური ან იურიდიული პირი, გარდა ფინანსური ორგანიზაციისა.

ახალი წესების შემუშავება განპირობებულია, ერთი მხრივ,  კანონმდებლობის ევროდირექტივებთან დაახლოების მიზნით, მეორე მხრივ, საფინანსო სექტორის ფინანსური მდგრადობისა და გამჭვირვალობის ხელშეწყობის, ასევე, საფინანსო სექტორისადმი საზოგადოების ნდობის ამაღლების და მომხმარებელთა ინტერესების მაქსიმალურად დაცვის მიზნით.

ცვლილებების სანახავად გადადით ბმულზე

0 comments
0 FacebookTwitterPinterestEmail
Die Form der Auszeichnungen über die Arbeitszeit
news-right-geRecht und Steuern Ge

საკანონმდებლო სიახლე: დამტკიცდა სამუშაო დროის აღრიცხვის წესი და აღრიცხვის ფორმა

by DWV Admin
written by DWV Admin

საქართველოს შრომის კოდექსის 24-ე მუხლი ითვალისწინებს დამსაქმებლის ვალდებულებას, სამუშაო დღეს წერილობით ან/და ელექტრონულად აღრიცხოს დასაქმებულთა მიერ ნამუშევარი დრო და სამუშაო დროის (ნამუშევარი საათების) აღრიცხვის ყოველთვიური დოკუმენტი. ასევე მოთხოვნის შემთხვევაში გააცნოს დასაქმებულს, გარდა იმ შემთხვევისა, როდესაც, სამუშაოს ორგანიზების სპეციფიკიდან გამომდინარე, ეს შეუძლებელია.

დამსაქმებელი ვალდებულია, სამუშაო დროის (ნამუშევარი საათების) აღრიცხვის დოკუმენტი შეინახოს 1 წლის განმავლობაში.

სამუშაო დროის აღრიცხვის ფორმა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის №01-15/ნ ბრძანებით განისაზღვრა.

ბრძანება ამოქმედდება 2021 წლის 1 მარტიდან.

დამატებითი ინფორმაციის სანახავად გადადით ბმულზე

0 comments
0 FacebookTwitterPinterestEmail
Legal Report 02.02.2021
news-right-geRecht und Steuern Ge

საკანონმდებლო სიახლე: ცვლილებები დღგ-ის გადამხდელებისათვის

by DWV Admin
written by DWV Admin

შემოსავლების სამსახურის უფროსის 2021 წლის 15 იანვრის N 107 ბრძანების საფუძველზე, განისაზღვრა თუ რა შემთხვევაში ენიჭება დღგ-ის გადამხდელად რეგისტრირებულ პირს კვალიფიციური ან არაკვალიფიციური დღგ-ის გადამხდელის სტატუსი. კანონში გაჩნდა ახალი ტერმინი „არაკვალიფიციური დღგ-ის გადამხდელი“. ცვლილებები 2021 წლის 20 იანვარს შევიდა ძალაში.
კვალიფიციური დღგ-ის გადამხდელს სტატუსის მქონე პირს უუქმდება აღნიშნული სტატუსი კონკრეტული წინაპირობების არსებობისას მომდევნო თვის 15 რიცხვისა და მიენიჭება არაკვალიფიციური დღგ-ის გადამხდელის სტატუსი.

ცვლილების შედეგად:
1. კვალიფიციური გადამხდელის სტატუსს მიიღებენ ის იურიდიული პირები, რომლებსაც ბოლო უწყვეტი 12 კალენდარული თვის განმავლობაში უფიქსირდებათ გადასახადის გადამხდელის პირადი აღრიცხვის ბარათზე გატარებული ოპერაცია.
წინააღმდეგ შემთხვევაში პირი ჩაითვლება არაკვალიფიციურ დღგ-ის გადამხდელად.

2. დღგ-ის გადამხდელად ახლად დარეგისტრირებული პირი დღგ-ის გადამხდელად რეგისტრაციის მომენტიდან ჩაითვლება არაკვალიფიციური დღგ-ის გადამხდელად.

დამატებითი ინფორმაციისთვის გადადით ბმულზე

0 comments
0 FacebookTwitterPinterestEmail
Legal News
Recht und Steuern GeTop-ge

საკანონმდებლო სიახლე – დაქირავებულ პირთა რეესტრი

by DWV Admin
written by DWV Admin

2021 წლის 1 თებერვლიდან, დაქირავებულ პირთა რეესტრის შევსება სავალდებულო გახდა. საკანონმდელო ცვლილებების მიხედვით, დამსაქმებელი ვალდებულია შემოსავლების სამსახურის ვებ-პორტალზე (www.eservices.rs.ge) შეავსოს დაქირავებულ პირთა რეესტრი მასთან დასაქმებულ ყველა თანამშრომელზე, ვისთანაც შრომითი ურთიერთობა აქვს.

დამქირავებელი პირი ვალდებულია 2021 წლის 1 მარტამდე დაქირავებულ პირთა რეესტრში ელექტრონულად ასახოს 2021 წლის 1 თებერვლის მდგომარეობით აქტიური და შეჩერებული სტატუსის მქონე დაქირავებული პირების შესახებ ინფორმაცია.

დამატებითი ინფორმაციისთვის გადადით ბმულზე

0 comments
0 FacebookTwitterPinterestEmail
Legal Report 02.02.2021
news-right-geRecht und Steuern Ge

იურიდიული ცნობარი: კანონპროექტი ატმოსფერული ჰაერის დაცვის შესახებ

by DWV Admin
written by DWV Admin

,,ატმოსფერული ჰაერის დაცვის შესახებ“ საქართველოს კანონში ცვლილებები შედის. კანონპროექტი პარლამენტში ორი მოსმენით უკვე დამტკიცებულია.

კანონი ითვალისწინებს შემდეგს:
– ზოგიერთი საქმიანობის სუბიექტი ვალდებულია, თვითმონიტორინგის მიზნით, აწარმოოს დაბინძურების სტაციონარული წყაროებიდან ატმოსფერულ ჰაერში მავნე ნივთიერებების ორგანიზებული გაფრქვევების ფაქტობრივი რაოდენობის უწყვეტი განსაზღვრა, ინსტრუმენტული მეთოდით.
– საქმიანობის სუბიექტის მიერ დაბინძურების სტაციონარული წყაროებიდან ატმოსფერულ ჰაერში მავნე ნივთიერებების ორგანიზებული გაფრქვევების ფაქტობრივი რაოდენობისა და ტემპერატურის განსაზღვრა წარმოებს უშუალოდ მავნე ნივთიერებების გაფრქვევის იმ წყარო(ებ)ზე (მილში), რომლ(ებ)ის მეშვეობითაც ხორციელდება დანართით გათვალისწინებული საქმიანობა.
– ატმოსფერულ ჰაერში იმ მავნე ნივთიერებების ნუსხა, რომელთა ორგანიზებული გაფრქვევების ფაქტობრივი რაოდენობის უწყვეტი ინსტრუმენტული მეთოდით განსაზღვრა სავალდებულოა, დადგინდება საქართველოს მთავრობის კანონქვემდებარე ნორმატიული აქტით.

ვრცლად კანონპროექტის შესახებ გაეცანით ინფორმაციას ამ ბმულზე

0 comments
0 FacebookTwitterPinterestEmail
Man sitting in front of a computer
Aktuellesnews-right-geRecht und Steuern Ge

თებერვლიდან დაქირავებულ პირთა რეესტრის შევსება სავალდებულო ხდება

by DWV Admin
written by DWV Admin

მიმდინარე წლის 1 თებერვლიდან, დაქირავებულ პირთა რეესტრის შევსება ხდება სავალდებულო, იუწყება შემოსავლების სამსახური.
როგორც აღნიშნულია, დამქირავებელი ვალდებულია 1 მარტამდე რეესტრში ელექტრონულად ასახოს, 2021 წლის 1 თებერვლის მდგომარეობით, აქტიური და შეჩერებული სტატუსის მქონე დაქირავებული პირების შესახებ ინფორმაცია. რეესტრის შევსება უნდა ხდებოდეს შემოსავლების სამსახურის ვებ-პორტალის მეშვეობით (eservices.rs.ge).
რეესტრში უნდა იყოს მითითებული დაქირავებული ფიზიკური პირის შესახებ შემდეგი ინფორმაცია: პირადი ნომერი, სახელი და გვარი, სქესი, მოქალაქეობა, დაბადების თარიღი, ტელეფონის ნომერი, სამუშაო განაკვეთი და სტატუსი (აქტიური, შეჩერებული, შეწყვეტილი).
ინფორმაციის არასწორად მითითება იწვევს საგადასახადო კანონმდებლობით განსაზღვრულ პასუხისმგებლობას, აღნიშნავს შემოსავლების სამსახური.

საინფორმაციო სააგენტო “სარკე”
18.01.2021

0 comments
0 FacebookTwitterPinterestEmail
X
Skip to content