დეველოპერული სექტორისთვის განკუთვნილი მთავრობის ანტიკრიზისული გეგმა მოიცავს შემდეგ პუნქტებს:
- სახელმწიფო მოახდენს იპოთეკური სესხის საპროცენტო განაკვეთის 4%-ის სუბსიდირებას, სესხის აღებიდან 5 წლის განმავლობაში. სუბსიდია გაიცემა არაუმეტეს 200,000-ლარიან სესხებზე.
- სახელმწიფო გასცემს იპოთეკური სესხის გარანტიას სესხის (არაუმეტეს 200,000 ლარი) 20%-ის ოდენობით, სესხის აღებიდან 5 წლის განმავლობაში. გარანტია გავრცელდება სესხებზე, სადაც თანამონაწილეობა შეადგენს არანაკლებ 10%-სა.
ორივე შეღავათი შეეხება მხოლოდ მათ, ვინც მიმდინარე წლის 1 ივნისიდან 2021 წლის 1 იანვრამდე პერიოდში აიღებს იპოთეკურ სესხს ახლად-აშენებული ბინის შესაძენად.
- სახელმწიფო დააზღვევს მიმდინარე მშენებლობებს. კერძოდ, ახალი პროგრამის ფარგლებში, სახელმწიფო გასცემს შესყიდვის გარანტიას, პროექტით გათვალისწინებული საცხოვრებელი ფართის არაუმეტეს 30%-ზე, გარანტიის გაცემიდან 3 წლის განმავლობაში.
ამ პროგრამის ფარგლებში, ბინების ნაწილი გადაეცემა დევნილებს.
- სახელმწიფო ასევე აპირებს, განახორციელოს 150 მილიონი ლარის ღირებულების 1,800-მდე მშენებარე ბინის შესყიდვას მიმდინარე წლის 1 მაისიდან 2021 წლამდე პერიოდში.
საინფორმაციო სააგენტო სარკე, 29.05.2020