დღეიდან აჭარა ტექსტილის სამკერვალო ფაბრიკაში პირბადეების ადგილობრივი წარმოება დაიწყო, იუწყება ეკონომიკისა და მდგრადი განვითარების სამინისტრო.
მინისტრის ნათია თურნავას თქმით, პირბადეების დამზადდება სხვადასხვა მასალისგან, რომელიც შეთანხმებულია დაავადებათა კონტროლის ეროვნულ ცენტრთან და შემოწმებულია რიჩარდ ლუგარის სახელობის საზოგადოებრივი ჯანდაცვის კვლევით ცენტრში (ე.წ. ლუგარის ლაბორატორია).
„პირველ ეტაპზე, ეს იქნება დოლბანდიდან დამზადებული პირბადეები, რომლებიც პოლიპროპილენის პირბადეებისგან განსხვავებით, საყოფაცხოვრებო პირობებში შეიძლება მრავალჯერ გამოვიყენოთ“ (გარეცხვის შემდეგ), განაცხადა მინისტრმა. ხოლო სამედიცინო მუშაკებისთვის პირბადეები იქნება ერთჯერადი, აღნიშნა მან.
თურნავას ინფორმაციით, საქართველოში პირბადეები შეიკერება 10-მდე სამკერვალო ფაბრიკაში, რომლებმაც გამოთქვეს შესაბამის სახელმწიფო პროგრამაში მონაწილეობის სურვილი.
საინფორმაციო სააგენტო სარკე, 19 მარტი 2020