საქართველოში FedEx-ის წარმომადგენლობა თბილისის აეროპორტთან ახლოს, 10,000 კვ.მ-ზე, 18 თვეში ლოგისტიკურ ცენტრს ააშენებს.
ამ მიზნით, წარმომადგენლობასა და აშშ-ს საერთაშორისო განვითარების საფინანსო კორპორაციას (DFC) შორის ფინანსური შეთანხმება გაფორმდა.
FedEx-ის ლიცენზიანტმა საინფორმაციო კომუნიკაციების სისტემები DFC-სგან $4 მილიონის სესხი აიღო, რომელიც 10 წლის განმავლობაში უნდა დაფაროს. კომპანიამ საკუთარი საინვესტიციო კაპიტალის მობილიზებაც მოახდინა.
„საქართველოში ამ პროექტის ანალოგი არ არსებობს“, – აცხადებს საინფორმაციო კომუნიკაციების სისტემების აღმასრულებელი დირექტორი, ნინო მენთეშაშვილი. მისი თქმით, ლოგისტიკური ცენტრი FedEx-ის გადაზიდვებს მოემსახურება, ამასთან, სხვა კომპანიებთან თანამშრომლობით, ის უზრუნველყოფს მათი პროდუქციის შენახვას, აღწერას, ქსელის ყოველდღიურ მომარაგებას.